सप्तकोशी नदीमा जलसतह खतरा तहभन्दा माथि, कोशीमा पानीको बहाव ५६ वर्षयताकै बढी

सप्तकोशी नदीमा पानीको बहाव ५६ वर्षयताकै उच्च रहेको छ। कोशी ब्यारेज कन्ट्रोल रूमका अनुसार आज बिहान ३ बजे गरिएको मापनमा बहाव प्रतिसेकेन्ड ६ लाख ४३ हजार ५४० क्युसेक पुगेको छ। यसअघि सन् १९६८ को अक्टोबर ५ मा कोशीमा अहिलेसम्मकै उच्च बहाव प्रतिसेकेन्ड ७ लाख ८८ हजार २०० क्युसेक मापन गरिएको थियो।

कोशीको जलसतह लगातार बढ्दै गएको र खतरा तहभन्दा ११.२६ मिटरमाथि पुगेकोले सबै ५६ ढोका खोलिएको छ। जलसतहको जोखिमका कारण सुनसरी, उदयपुर, र सप्तरीका होचा भूभागमा डुबानको खतरा बढेकोले सुरक्षित स्थानमा जान सतर्कता अपनाउन सप्तकोशी चतरा जलमापन केन्द्रले सूचना जारी गरेको छ।

पानीको बहाव उच्च भएकाले मानिस र सवारीसाधनको आवागमन अर्को सूचना जारी नभएसम्मका लागि बन्द गरिएको सुनसरीका प्रमुख जिल्ला अधिकारी रामचन्द्र तिवारीले जानकारी दिएका छन्।