पुटिन र जेलेन्स्कीबीच वार्ताको सम्भावना बढ्यो

मस्को: टर्कीको इस्तानबुलमा रुस र युक्रेनबीच वार्तापछि रुसले उत्तरी युक्रेन र राजधानी किभनजिकै सैन्य गतिविधि कम गर्ने जनाएको छ । रुसी रक्षामन्त्री अलेक्जेन्डर फोमिनले यसबारे जानकारी दिएका छन् । वार्तामा सहभागी प्रतिनिधिहरूले इस्तानबुल वार्ता सकारात्मक रहेको प्रतिक्रिया दिएका छन् ।
रुसी रक्षामन्त्री फोमिनले भने वार्ता व्यावहारिक रुपमा अघि बढेको भन्दै किभ र चेर्नेगिभ क्षेत्रमा सैन्य गतिविधि घटाउने निर्णय गरिएको उल्लेख गरेका हुन् ।
यस्तै वार्ताका मध्यस्थकर्ता एवं रुसी प्रतिनिधिमण्डलका संयोजक भ्लादिमिर मेडेन्सकीले वार्तामा अर्थपूर्ण छलफल भएको बताएका छन् । साथै युक्रेनी प्रस्ताव रुसी राष्ट्रपति भ्लादिमिर पुटिनसमक्ष राखिने उनले जानकारी दिए । उनले इस्तानबुल वार्तालाई पहिलो वार्तापछिकै सबैभन्दा अर्थपूर्ण उपलब्धि भएको प्रतिक्रिया दिएका छन्।

रुसी प्रतिनिधिमण्डलले रचनात्मक रुपमा वार्ता अघि बढेको बताएका प्रतिक्रिया दिएका छन् । साथै वार्तामा आएका प्रस्तावमाथि समीक्षा गरिने उनीहरूले बताए ।
वार्तामा सहभागी अधिकांश प्रतिनिधिहरूले यसलाई सकारात्मक उपलब्धिको रुपमा लिएका छन् । उनीहरूले इस्तानबुलको मंगलबारको वार्तालाई उल्लेखनीय उपलब्धिको रुपमा व्याख्या गरे ।

युक्रेनका केही प्रतिनिधिहरूले भने अहिलेसम्म युद्धविराम भइनसकेको भन्दै केही मुद्दा अझै थाती रहेको बताएका छन् । धेरै मुद्दा अझै समाधान हुन बाँकी नै रहेको उनीहरूको भनाइ छ । साथै क्रिमियाबारे अलग्गै वार्ता आवश्यक रहेको उनीहरूले अडान राखेका छन् । थाती रहेका मुद्दाबारे आगामी दुई साताभित्र फेरि वार्तामा बस्ने प्रस्ताव पनि युक्रेनी वार्ता टोलीले राखेको छ ।

यद्यपि युक्रेनी प्रतिनिधिहरूले इस्तानबुल वार्तापछि अब पुटिन र जेलेन्स्कीबीच वार्ताको सम्भावना बढेको बताएका छन् । मंगलबार टर्कीको इस्तानबुलमा रुस र युक्रेनका प्रतिनिधिहरूबीच वार्ता भएको हो । यसअघि टर्की र बेलारुसमा गरी तीनपटक वार्ता गरिए पनि ती वार्ता सफल हुन सकेका थिएनन् ।