चिलिमे जलविद्युत कम्पनी लिमिटेड (CHCL) ले आर्थिक वर्ष २०७८/७९ को दोश्रो त्रैमासको वित्तिय विवरण प्रकाशित गरेको छ। विवरण अनुसार कम्पनीले यस त्रैमास सम्ममा रु.४०.१२ करोड खुद नाफा आर्जन गरेको छ। खुद नाफा अघिल्लो आर्थिक वर्षको दोश्रो त्रैमासको तुलनामा २.२४% ले बढि रहेको छ। खुद नाफा बढे पनि शेयर संख्या बढेकोले कम्पनीको प्रति शेयर आम्दानी भने रु.१२.५० बाट घटेर रु.११.७७ कायम हुन आएको छ।
विद्युत बिक्री आम्दानी घटेपनि वित्तिय आम्दानी बढेकोले कम्पनीको खुद नाफामा प्रगति देखिएको हो। वित्तिय आम्दानीमा अधिकांश हिस्सा मुद्दती निक्षेपको व्याज आम्दानी रहेको छ।
रु.६.७५ अर्ब चुक्ता पूंजी रहेको कम्पनीको जगेडा तथा कोष ७.६४% ले घटेर रु.३.२७ अर्ब कायम रहेको छ। यस्तै, कम्पनीको कुल शेयरधनीकोष वृद्धि भएर रु.१०.०३ अर्ब कायम हुन आएको छ। शेयरधनीकोष बढे पनि शेयर संख्या बढेकोले कम्पनीको प्रति शेयर किताबी मुल्य रु.१५६.५३ बाट घटेर रु.१४८.५७ कायम हुन आएको छ।
