१९८ स्टकको मूल्य घट्दा ४३ अंक घट्यो नेप्से २६१०.६० विन्दुमा

 साताको दोस्रो कारोबार दिन सोमबार नेप्से परिसूचक १.६२ प्रतिशत घटेर २६१०.६० विन्दुमा झरेको छ। यस दिन सेन्सेटिभ इण्डेक्स १.३१ प्रतिशत घटेको छ भने फ्लोट इण्डेक्स १.५७ अंक र सेन्सेटिभ फ्लोट इण्डेक्स १.३५ प्रतिशत घटेको छ।नेप्से परिसूचक ४३ अंक घटेर बन्द भएको छ।यस दिन कारोबारमा आएका १९८ स्टकको मूल्य ओरालो लागेसँगै नेप्सेले सो बराबरको अंक गुमाएको छ।

सोमबार १९८ स्टकको मूल्य घटेको छ। जसमध्ये तेह्रथुम पावर कम्पनी र सामलिङ पावर कम्पनीको शेयरमूल्य नकारात्मक सर्किट लेभलमा कारोबार भएको छ। तेह्रथुम पावरको शेयरमूल्य यस दिन ७८ रुपैयाँ ८० पैसा घटेर ७०९ रुपैयाँ २० पैसामा अन्तिम कारोबार भएको छ भने सामलिङ पावरको ७९ रुपैयाँ घटेर ७११ रुपैयाँमा अन्तिम कारोबार भएको छ। यस दिन दिव्यश्वरी हाइड्रोपावरको शेयरमूल्य साढे ८ प्रतिशत घटेको छ। यस दिन २० स्टकको मात्र मूल्य बढेको छ जसमध्ये अधिकांश म्युचुअल फण्ड र डिबेन्चर रहेका छन्।

यस दिन १३ वटै उपसमूहको परिसूचक घटेको छ। जसमध्ये जलविद्युत उपसमूहको परिसूचक सर्वाधिक ३.०९ प्रतिशत घटेको छ। त्यसैगरी, यस दिन वित्त, लगानी, जीवन बीमा, उत्पादन तथा प्रशोधन, निर्जीवन बीमा र व्यापार उपसमूहको परिसूचक २ प्रतिशतभन्दा बढी घटेको छ।

कारोबार रकमका आधारमा यस दिन अपि पावर कम्पनी शीर्ष स्थानमा रहेको छ। सो कम्पनीको यस दिन १६ करोडभन्दा बढीको शेयर कारोबार भएको छ। त्यसैगरी, यस दिन अरुण भ्यालु हाइड्रोपावरको करिब १५ करोडको शेयर कारोबार भएको छ भने हिमालयन डिष्टिलरी र अपर तामाकोशीको १३ करोडभन्दा बढीको शेयर किनबेच भएको छ।