जापानको व्यापार घाटा ८ वर्षयताकै उच्च,जनवरी महिनामा १९ अर्ब अमेरिकी डलर घाटा

काठमाडौं : जापानले जनवरी महिनामा १९ अर्ब अमेरिकी डलर व्यापार घाटा व्यहोरेको छ । तेल, ग्यासलगायत उर्जा आयातमा लागत बढेपछि जापानको व्यापार घाटा ८ वर्ष यताकै उच्च पुगेको हो । जापानको अर्थमन्त्रालयका अनुसार गत वर्षको सोही अवधिको तुलनामा आयात ३९.६% ले बढ्दा निर्यात ९.६% ले मात्र बढेको छ । फलस्वरुप, जापानले लगातार छैटौं महिना व्यापार घाटा व्यहोरेको छ ।

हालको व्यापार घाटा सन् २०१४ जनवरीयताकै उच्च हो । विश्वको तेस्रो ठूलो अर्थतन्त्र भएको जापानले करिब सम्पूर्ण तेल र ग्यास आयात गर्ने गरेको छ । पछिल्लो समय युक्रेन र रुसबीच तनाव बढ्दै गएपछि तेल तथा ग्यासको भाउमा उच्च वृद्धि हुँदा जापानको व्यापार घाटा चुलिएको हो ।

अर्कोतर्फ, जापानको मुद्रा अमेरिकी डलरको तलनामा कमजोर देखिएको छ । साथै, कम्प्युटर चिप अभावका कारण इलेक्ट्रोनिक सामान र सवारी साधनको उत्पादनमा पनि कमी आएको छ । जसका कारण पछिल्लो समय जापानको निर्यात केही कमजोर बनेको छ ।