काठमाडौं : आगामी मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि मनोनयन दर्ता भएको उम्मेदवारको सूची निर्वाचन आयोगले प्रकाशन गरेको छ। प्रत्यक्षतर्फ १ सय ६५ प्रतिनिधिसभा र ३ सय ३० प्रदेशसभा निर्वाचन क्षेत्रमा उम्मेदवारीका लागी प्रतिनिधिसभातर्फ २ हजार ४ सय ७३ (पुरुष- २ हजार २ सय ४२, महिला- २ सय ३१), प्रदेशसभा तर्फ ३ हजार ३ सय ९३ (पुरुष- ३ हजार ९९, महिला-२ सय ९३ र अन्य- १) जनाले मनोनयन दर्ता गरेको निर्वाचन आयोगले प्रकाशन गरेको सुचिमा उल्लेख छ । अन्तिम नामावलि प्रकाशन गर्दा सम्म याे सख्या थपघट हुन सक्ने आयोगले जनाएकाे छ ।
निर्वाचनका लागि मनोनयन दर्ता गरेका उम्मेदवारमाथि आज उजुरी दिन सकिने आयोगले जनाएको छ। आयोगले उम्मेदवारको विरोधमा उजुरी दिने समय सोमबार बिहान १० देखि दिउँसो ३ बजेसम्म निर्धारण गरेको छ।
मनोनयपत्र र उजुरीउपर जाँचबुझ गरी निर्णय गर्ने समय सोमबार दिउँसो ३ बजेदेखि २५ गते साँझ ५ बजेसम्म रहेको छ।
यसैगरी उम्मेदवारको नामावली प्रकाशन गर्न असोज २५ गते साँझ ५ बजे देखि ७ बजेसम्म, उम्मेदवारको नाम फिर्ता लिन असोज २६ गते बिहान १० बजेदेखि दिउँसो १ बजेसम्म, उम्मेदवारको अन्तिम नामावली प्रकाशन गर्न २६ गते दिउँसो १ देखि ३ बजेसम्म, उम्मेदवारलाई निर्वाचन चिह्न प्रदान गर्न २६ गते अपराह्न ४ बजेदेखि साँझ ७ बजेसम्म हुनेछ।
आगामी निर्वाचनका लागि मतदाता नामावलीमा एक करोड ७९ लाख ८८ हजार पाँच सय ७० मतदाता सङ्ख्या रहेका छन्। निर्वाचनका लागि देशभर १० हजार आठ सय ९२ मतदानस्थल र सो अन्तर्गत २२ हजार दुई सय २७ मतदान केन्द्र कायम गरिएको छ।
