लुम्विनी मेडिकल कलेजमा आमा सुरक्षा कार्यक्रम सञ्चालन

पाल्पा – लुम्विनी मेडिकल कलेजमा आमा सुरक्षा कार्यक्रम सञ्चालन भएकाे छ । तानसेन नगरपालिका र लुम्विनी मेडिकल कलेजका बीचमा सम्झौता भएपछि कार्यक्रम सञ्चालन भएको हो । तानसेन नगरपालिकाका प्रमुख प्रशासकीय अधिकृत जीवन ज्ञवाली र लुम्वनी मेडिकल कलेजका कार्यकारी अध्यक्ष गाेपाल पाेखरेलले सम्झौतापत्रमा हस्ताक्षर गर्नुभएकाे छ । लुम्विनी मेडिकल कलेज प्रभासमा गर्भवती महिलालाई सुत्केरी सेवा निशुल्क प्रदान हुनेछ ।

यो कार्यक्रम सञ्चालन भएपछि गर्भवती महिलाले सुत्केरी हुँदा अस्पतालमा सबै खालको सेवा निशुल्क पाउने तानसेन नगरपालिकाका प्रमुख सन्तोषलाल श्रेष्ठले बताउनुभयो । यस्तै अस्पतालमा सुत्केरी हुन आएको यातायात खर्च, गर्भवती जाँचको खर्च समेत सुत्केरीले पाउने उहाँले बताउनुभयो । दुई वर्षदेखि आमा सुरक्षा कार्यक्रम सञ्चालन नहुँदा सुत्केरी महिलाले अस्पतालमा सुत्केरी खर्चवापत चर्को मुल्य तिर्न बाध्य भएका थिए । सरकारले सुत्केरी सेवावापत दिदैँ आएको रकम कम भएको भन्दै सेवा नदिने निर्णय लुम्विनी मेडिकल कलेजले गरेको थियो ।