१३३औं अन्तर्राष्ट्रिय श्रमिक दिवसका अवसरमा शुभकामना व्यक्त गर्दै राष्ट्रपति भण्डारीले यस्ताे बताएकी हुन्।

उनले भनेकी छन्, ‘विश्वभरिका श्रमिकहरूले एकआपसमा ऐक्यबद्धता आदानप्रदान गर्दै श्रमिक अधिकारको रक्षा र प्रवर्द्धनको लागि सबैलाई जागरुक बनाइराख्ने अवसरको रूपमा अन्तराष्ट्रिय श्रमिक दिवस अर्थात् मे दिवस मनाइन्छ। यस दिवसले मुलुकको आर्थिक विकास प्रक्रियामा श्रम र सीपको महत्तवलाई उजागर गर्दै श्रमलाई सम्मान गर्ने संस्कृतिको निर्माणमा थप योगदान गर्नेछ भन्ने अपेक्षा गरेकाे छु।’

राष्ट्रपति भण्डारीले राष्ट्रकाे समृद्धिमा याेगदान गर्ने सम्पूर्ण श्रमिकहरूप्रति सम्मान प्रकट गरेकी छन्।

‘यस अवसरमा मुलुकको उद्योग, कृषि, निर्माण र सेवालगायत श्रमका विभिन्न क्षेत्रमा आफ्नो श्रम र सीप लगानी गरी राष्ट्रको समृद्धिमा योगदान गर्ने सम्पूर्ण श्रमिकहरूप्रति म हार्दिक सम्मान प्रकट गर्दछु’, जारी गरिएकाे शुभकामना सन्देशमा भनिएकाे छ।

राष्ट्रपति भण्डारीले संविधानले सम्पूर्ण नागरिकका लागि रोजगारीको हक सुनिश्चित गरी प्रत्येक श्रमिकका लागि उचित पारिश्रमिक तथा योगदानमा आधारित सामाजिक सुरक्षाको हकलाई समेत प्रत्याभूत गरेको स्मरण गराएकी छन्।

उनले श्रम र सीप लगानी गरी राष्ट्रको समृद्धिमा योगदान गर्न आह्वान गरेकी छन् ।

‘न्याय र समानतामा आधारित समाजवादोन्मुख अर्थतन्त्र निर्माण गर्न संवैधानिक प्रावधानको कार्यान्वयन गरी श्रमजीवी नागरिकलाई त्यसको प्रत्यक्ष लाभ सुनिश्चित गर्नु हाम्रो दायित्व हो’, उनले भनेकी छन्।