मन्त्री भट्टराईले नागरिक उड्डयन प्राधिकरणका महानिर्देशक राजन पोखरेललाई मन्त्रालय बोलाएर निर्णय कार्यान्वयन नगर्न निर्देशन दिएका हुन्।‘कुनै पनि ठूला निर्णय गर्दा मन्त्रीसँग छलफल गरेरमात्रै निर्णय गर्न निर्देशन भएको छ’, संस्कृति, पर्यटन तथा नागरिक उड्डयन मन्त्रालय उच्च स्रोतले नेपालखबरसँग भन्यो, ‘हिमालय एयरलाइन्लाई सेल्फ ग्राउण्ड ह्याण्डलिङसम्बन्धी निर्णय कार्यान्वयन नगरी यथास्थितिमा राख्नु भन्ने निर्देशन भएको छ।’
त्रिभुवन विमानस्थलको ग्राउण्ड ह्याण्डलिङको जिम्मा नेपाल वायुसेवा निगमले पाएको छ। वायुसेवा निगमको मुख्य आयस्रोत रहेको ग्राउण्ड हेन्डलिङ अरुलाई दिँदा निगमको आम्दानी गुम्ने भन्दै विरोध भएको थियो।
यो पनि –
हिमालय एयरलाइन्सले आफैँ ‘ग्राउण्ड ह्याण्डलिङ’ गर्न पाउने
नेपाल वायुसेवा निगमको आधिकारिक ट्रेड युनियनले समेत वायुसेवा निगमको आम्दानी गुम्ने गरी हिमालय एयरलाइन्सलाई अनुमति दिएको भन्दै विरोध जनाएको थियो।
‘हिमालय एयरलाइन्सको व्यावसायिक र प्राविधिक क्षमता अझै पुगेको देखिएन, त्यसैले निर्णय कार्यान्वयन नगर्न निर्देशन दिइएको हो’, मन्त्रालय स्रोतको भनाइ छ।
नेपाल नागरिक उड्डयन प्राधिकरणले प्राधिकरणको ग्राउण्ड ह्याण्डलिङ निर्देशिका २०७२ को परिच्छेद २ को दफा ४ अनुसार सुविधा दिएको बताएको थियो। उक्त दफामा हप्तामा ३५ भन्दा बढी उडान गर्नेले सेल्फ ग्राउण्ड ह्याण्डलिङ गर्न पाउने व्यवस्था रहेको छ।
प्राधिकरणका अनुसार हिमालय एयरलाइन्सले २०७६ चैत ७ गतेमा आवेदन दिएको थियो। निर्देशिकाको प्रावधान पूरा भएको भन्दै प्राधिकरणले भदौ २८ गते अनुमति प्रदान गरेको थियो।वायुसेवा निगमले आफ्नोबाहेक २५ विदेशी वायुसेवा प्रदायकहरुलाई समेत व्यावसायिक ग्राउण्ड ह्याण्डलिङ सेवा प्रदान गर्दै आएको छ।