भारतका पूर्व मन्त्री तथा भाजपाका संस्थापक सदस्य जसवन्त सिंहको निधन

भारतका पूर्व केन्द्रीय मन्त्री जसवन्त सिंहको निधन भएको छ। भारतीय जनता पार्टी (भाजपा) का संस्थापक सदस्य मध्ये एक जसवन्त सिंहको ८२ वर्षको उमेरमा आइतबार निधन भएको भारतीय सञ्चारमाध्यमले जनाएका छन् ।

राजस्थानको बाडमेरका जसवन्तले अटल विहारी बाजेपेयीको सरकारमा विदेश, रक्षा र वित्त मन्त्रीको जिम्मेवारी सम्हालेका थिए । उनी भारतीय सेनाका पूर्व मेजर पनि हुन् ।

प्रधानमन्त्री नरेन्द्र मोदीले सिंहको निधनप्रति गम्भीर दुःख व्यक्त गरेका छन् । ट्वीट मार्फत उनले श्रद्धाञ्जली अर्पण गर्दै सिंहले पूरै लगनका साथ देशको सेवा गरेको बताएका छन् ।

सन् २०१४ मा घरकै बाथरुममा लडेपछि जसवन्त सिंहको टाउकोमा गम्भीर चोट लागेको थियो । त्यसयता उनी कोमामा थिए।