झापा–२ मा इन्दिरा राना मगरको जीत, सभामुख देवराज घिमिरे ४८ हजारभन्दा बढी मतान्तरले पराजित

झापा, फागुन २४ — विघटित प्रतिनिधिसभाकी उपसभामुख इन्दिरा राना मगरले अघिल्लो संसद्का सभामुख देवराज घिमिरेलाई झापा क्षेत्र नम्बर–२ बाट भएको निर्वाचनमा फराकिलो मतान्तरले पराजित गरेकी छन्।

२०७९ को निर्वाचनमा समानुपातिक सांसदका रूपमा संसद् प्रवेश गरेकी मगर यसपटक प्रत्यक्ष निर्वाचनबाट निर्वाचित हुँदै घिमिरेको संसदीय यात्रामा विराम लगाइदिएकी छन्।

निर्वाचन परिणामअनुसार मगरले ६० हजार १ सय १० मत प्राप्त गरिन् भने घिमिरेले त्यसको तुलनामा निकै कम मत प्राप्त गर्दै ४८ हजार ७ सय ४२ मतान्तरले पराजय भोगे।

यसैगरी, श्रम संस्कृति पार्टीका केशवकुमार भण्डारीले ७ हजार २ सय ९१ मत प्राप्त गर्दै तेस्रो स्थान हासिल गरे। नेपाली कांग्रेसकी सरिता प्रसाईँले ५ हजार ६ सय १६ मत ल्याउँदै चौथो स्थानमा रहिन्।

अघिल्लो निर्वाचनमा दोस्रो स्थानमा रहेका राप्रपाका भद्रप्रसाद नेपाल (स्वागत) यसपटक भने ३ हजार ९ सय ६६ मतसहित पाँचौं स्थानमा सीमित भए। २०७९ को निर्वाचनमा उनले २६ हजार ४ सय ५५ मत प्राप्त गरेका थिए।

झापा–२ मा यसपटकको परिणामलाई राजनीतिक रूपमा महत्त्वपूर्ण मानिएको छ, जहाँ पूर्वसभामुख र पूर्वउपसभामुखबीचको प्रतिस्पर्धामा रास्वपाकी उम्मेदवार मगरले स्पष्ट जनमत प्राप्त गरेकी छन्।