“झापा बिर्तामोडमा मोटरसाइकल दुर्घटना: २७ वर्षीय युवकको दुखद निधन”

बिर्तामोड। झापाको बिर्तामोड–१० ठुटेबरमा भएको मोटरसाइकल दुर्घटनामा एक जनाको मृत्यु भएको छ। गएराति अन्दाजी ८:३० बजे बिर्ताबजारबाट सैनिकबजारतर्फ जाँदै गरेको प्र१–०१–०१२ प ५८९१ नम्बरको मोटरसाइकलले विपरीत दिशाबाट आएको साइकलयात्रीलाई जोगाउने प्रयास गर्दा अनियन्त्रित भएर पल्टिएको थियो।

दुर्घटनामा २७ वर्षीय अनिस न्यौपाने, जो बिर्तामोड–१० का बासिन्दा हुन्, गम्भीर घाइते भएका थिए। टाउको र दुबै खुट्टामा गहिरो चोट लागेको अवस्थामा उनलाई उपचारका लागि बीएण्डसी हस्पिटल लगिएको थियो, तर उपचारकै क्रममा दिउँसो २ बजे उनको मृत्यु भएको हो।

मोटरसाइकलमा पछाडि सवार ३८ वर्षीय टिकाराम राय पनि दुर्घटनामा परेका थिए। उनको चोट सामान्य भएको र बीएण्डसी अस्पतालमै उपचार भइरहेको छ। दुर्घटनामा परेका मोटरसाइकललाई अस्थायी प्रहरी चौकी सैनिकबजारले नियन्त्रणमा लिएको छ।