बिर्तामोडका १६ वटा विद्यालयलेल छात्रवृत्ति वितरणको विवरण बुझाउन बाँकी

झापा। असार मसान्तभित्र छात्रवृत्तिको विवरण पेश गर्न बिर्तामोड नगरपालिकाले निर्देशन दिएपनि नगरका कतिपय विद्यालयले अझै पनि विवरण बुझाएका छैनन् ।

बिर्तामोड नगरपालिकामा ५८ वटा संस्थागत विद्यालय छन् । तीमध्ये ४२ वटाले छात्रबृत्ति वितरणको विवरण बुझाएको र बाँकी १६ वटाले नबुझाएको नगरपालिकाको शिक्षा शाखाले जनाएको छ । नगरपालिकाले असार ८ र १५ गते गरी दुईपटक छात्रवृत्तिको विवरण बुझाउन सूचना जारी गरेको थियो । तर, पनि कतिपय विद्यालयहरुले अटेर गरिरहेका छन् ।

सात दिने म्यादसहित भोलि अन्तिम सूचना प्रकाशित गर्न लागेको शिक्षा शाखा प्रमुख तिलचन भण्डारीले बताए । ‘हामी भोलि ७ दिने म्यादसहितको अन्तिम सूचना निकाल्दै छौं ’ निमित्त प्रमुख प्रशासकीय अधिकृतसमेत रहेका भण्डारीले भने,‘त्यसपछि जरिवानासहित दर्ता खारेजको प्रक्रिया अघि बढ्नेछ ।

’ नगरका विद्यालयहरुलाई बारम्बार भन्दै आएपनि अटेर गरेर कतिपय विद्यालयहरुले अझै पनि छात्रवृत्ति विवरण नबुझाएको नगर प्याव्सनका अध्यक्ष उत्तम खनालले बताए ।