अपडेट: ६.४ रेक्टर स्केलको भूकम्पले जाजरकोटमा ३४ र पश्चिम रुकुममा ३६ जनाको मृत्यु

काठमाडौँ-  शुक्रबार मध्यराति ११ बजेर ४७ मिनेट जाँदा जाजरकोट केन्द्रविन्दु भई गएको भूकम्पका कारण अहिलेसम्म जिल्लामा मात्र ३४ जनाको ज्यान गएको पुष्टि भइसकेको त्यहाँका प्रमुख जिल्ला अधिकारी सुरेश सुनारले जानकारी दिएका छन्।

६.४ रेक्टर स्केलको भूकम्पमा मृतकको संख्या अझै बढ्न सक्ने स्थानीय अधिकारीहरुले जानकारी दिएका छन्। घटनामा सयौँ जना घाइते भएका छन् भने ठूलो संख्यामा घरहरु भत्किएका छन्।

भूकम्पमा सबैभन्दा बढी क्षति जाजरकोट र पश्चिम रुकुममा भएको छ। पश्चिम रुकुममा अहिलेसम्म ३६ जनाको ज्यान गुमेको प्रहरीले जानकारी दिएको छ।

शुक्रबार राति जाजरकोट केन्द्रविन्दु भई ६.४ रेक्टर स्केलको भूकम्प गएको थियो।