आर्थिक अनियमितताको कारण बंगलादेशी बीमकको जीवन बीमा कोष खुम्चियो

ढाका । बंगलादेशको धितो पत्र बजारमा सूचीकृत जीवन बीमकको बीमा कोष पछिल्लो पाँच वर्षयता घट्दै गएको छ । उच्च संचालन लागत, बीमा कोषको दुरूपयोग लगायत कारणले गर्दा जीवन बीमकको मेरूदण्ड मानिने बीमाकोष कमजोर हुँदै गएको हो ।

बंगलादेशी अखबार द डेली स्टारले बंगलादेशका कूल ३३ मध्ये सूचीकृत १३ वटा जीवन बीमकको बीमा कोषको तुलनात्मक तथ्यांक सार्वजनिक गर्दै सन् २०१५ यता जीवन बीमा कोष यथावत रहेको उल्लेख गरेको छ । जीवन बीमकहरूबीच प्रतिस्पर्धा चुलिए पनि जीवन बीमामा सर्वसाधारणको पहुँच वृद्धिमा योगदान पुगेको छैन ।

द डेली स्टारका अनुसार बंगलादेशमा कूल जनसंख्याको जम्मा शुन्य दशमलव ४ प्रतिशत जनसंख्याको बीमामा पहुँच पुगेको छ । यो एशिया महादेशकै सबैभन्दा न्यून हो ।

जीवन बीमा कम्पनीहरूमध्ये पोपुलर लाइफ इन्स्योरेन्स कम्पनी लिमिटेड संचालनमा आएको दुइ दशक पुरा भएको छ । यो कम्पनीको बीमा कोष अहिले ३८ प्रतिशतले खुम्चिएको छ । त्यसैगरी फेयरेष्ट इस्लामी जीवन बीमा कम्पनीको बीमा कोष २१ प्रतिशतले ह्रास आएको छ ।

मृत्यु दाबी भुक्तानी र पूर्णावधि दाबी भुक्तानीमा करिब १० वटा जीवन बीमा कम्पनीले आलटालका कारण जीवन बीमा प्रति सर्वसाधारणको विश्वास खस्किएको छ ।

सन् २०१५ देखि २०१७ सम्ममा नियामक निकायको कमजोर नियमनका कारण जीवन बीमा कम्पनीको संचालक समितिले जीवन बीमा कोषको व्यापक दुरूपयोग गरेका घटना अहिले सार्वजनिक भइरहेका छन् । बंगलादेश बीमा विकास तथा विनियामक प्राधिकरणका अध्यक्ष स्वयम् पनि भ्रष्टाचारको मुद्दा खेपि रहेका छन् ।