इन्धनबाट चल्ने सवारीसाधनलाई विद्युतीय बनाउन बाटो खुल्यो

काठमाडौँ: पेट्रोलियम पदार्थबाट चल्ने सवारीसाधनलाई अब विद्युतीय बनाउन पाइने भएको छ । सरकारले राजपत्रमा सूचना जारी गर्दै इन्धनबाट चल्ने सवारीसाधनलाई विद्युतीय बनाउन बाटो खोलेको हो । ३ वर्षसम्मका लागि इन्धनका सवारीसाधनको इन्जिन वा चेसिसमा परिवर्तन गर्न पाउने व्यवस्था गरिएको छ ।
सवारी तथा यातायात व्यवस्था ऐन २०४९ को दफा ३९ को उपदफा (२)को प्रतिबन्धात्मक वाक्यांश तीन वर्षसम्म लागू नहुनेगरी इन्धन प्रणालीमा वातावरणमैत्री वा ऊर्जा दक्षतामूलक फेरबदल गरिने सवारीसाधनको हकमा छुट दिने निर्णय भएको’ राजपत्रमा उल्लेख छ ।
ऐनको १७६ मा सरकारले केही कामहरुलाई केही समयका लागि छुट दिन सक्ने व्यवस्था छ । यहीं व्यवस्थामा टेकेर सरकारले पेट्रोलियम इन्जिनको सवारीलाई विद्युतीय बनाउन छुट दिने भएको विभागका महानिर्देशक नमराज घिमिरेले बताए । उनले भने, ‘इन्जिन पेट्रोलियम पदार्थबाट नचल्ने तर वैकल्पिक ऊर्जाबाट सकिन्छ भने त्यसलाई पनि चलाउन अनुमति दिने भन्ने हो ।’ हाल स्वीकृतिबिना पेट्रोलियम सवारीसाधनको इन्जिन वा चेसिसमा परिवर्तन हुनेगरी हेरफेर गर्न नहुने व्यवस्था छ । पेट्रोलियम पदार्थबाट संचालन हुने सवारीलाई विद्युतीयमा रुपान्तरण गरेपछि विभिन्न करमा पनि विद्युतीय सवारीसाधन सरह छुट हुनेछ ।