विराटनगरका १९९ परिवार विस्थापित, तीन दिन विद्यालय बन्द

विराटनगर: मंगलबार बिहानैदेखि परेको अविरल वर्षापछि बस्तीहरूमा खोला पस्दा विराटनगर महानगरपालिका क्षेत्रभित्र १९९ घर परिवार विस्थापित भएका छन् । बाढी र डुबानको जोखिम बढ्दै गएपछि मंगलबार महानगरपालिकाका नवनिर्वाचित जनप्रतिनिधिहरूको आकस्मिक बैठकमा जिउँ ज्यानको सुरक्षालाई प्राथमिकता दिनुपर्नेमा वडाध्यक्षहरूले जोड दिए ।

महानगरपालिका पूर्वतिर सिंघीया र पश्चिममा केशलिया खोलाको पानी बस्तीमा पसेको हो । बस्तीहरुमा पानी पस्दा खोला किनारका घरहरु डुबानमा परेका हुन् । वडा १ मा ३० घर, २ मा ८२, ७ मा ५२ र ८ मा ३५ घर विस्थापित भएको जनाइएको छ । जोखिम क्षेत्रका अधिकांशलाई सुरक्षित स्थानमा सारिएको छ ।
सिंघीया खोलाको पानी सहजै पस्ने विराटनगरको वडा नम्बर १, २ र ७ र ८ का बस्तीहरु डुबेका हुन् । बर्सेनिको बाढी र डुबानको समस्याको दिगो समाधान हुन नसक्दा विराटनगरमा खोला किनारका अधिकांश बस्तीहरु डुब्दै आएका छन् ।

विराटनगर–३ स्थित जलमग्न भएको उदयमार्गमा स्थानीयले बाँस तेर्‍स्‍याएका छन् । खाल्डाखुल्डी भएको सडक जलमग्न भएकोले सवारी साधनहरु गुड्दा दुर्घटना हुने जोखिम बढेको भन्दै उनीहरुले बाँस तेर्‍स्‍याएर बाटो बन्द गरेको बताए ।

विराटनगर–९ को हिमालय रोडलाई नमूना सडकका रूपमा बनाइएको एमजी रोड डुबानमा परेको छ । मेनरोडदेखि पुष्पलाल चोक खण्डको नमुना सडक अन्तर्गत भट्टाचोकमा नालाको निकास थुनिँदा सडकबाटै पानी बगेको छ ।

महानगरको पश्चिमपट्टि वडा नम्बर ४, ५, ६, ११, १३ का बस्तीहरुमा पानी पसेर डुबान भएको वडाध्यक्षहरूले जानकारी दिए ।

विराटनगर–रंगेली सडक खण्डमा ह्युमपाइप थुनिँदा नगरपालिकाले सडक भत्काएर पानीको निकास खुलाएको छ । मोरङकै ग्रामथान गाउँपालिका–६ र ७ मा केही स्थानका सडकमा रहेका ह्युमपाइप बाढीले बगाएको स्थानीय नरेन्द्र बस्नेतले जानकारी दिए । उनले बस्तीहरूमा पानी पसेर जलमग्न भएको जानकारी दिए ।

बुढीगंगा गाउँपालिका–१ खापटोलमा सिंघीया खोलाले कटान गर्न थालेपछि खोला किनारका स्थानीयलाई सुरक्षित स्थानमा सारिएको छ । वर्षापछिको बाढीले मोरङको बेलबारी, उर्लाबारी, सुन्दरहरैंचा लगायतका स्थानीय तहका धेरै ठाउँ डुबानमा परेको छ । वर्षाले झापामा १६० घर परिवार प्रभावित भएका छन् । थप ३५० घर उच्च जोखिममा रहेको जिल्ला प्रहरी कार्यालय झापाले जनाएको छ ।

बाढी बस्तीमा पसेर डुबान हुन थालेपछि सोमबार अपरान्ह विराटनगर महानगरपालिकामा मेयर नागेश कोइराला, उपमेयर शिल्पा निराला कार्की र प्रमुख प्रशासकीय अधिकृत उमेश बस्नेसहित महाशाखा प्रमुखहरुको आकस्मिक बैठकले रेस्पोन्स टिम बनाउने निर्णय गरेको छ ।

महानगरमा बाढी र डुबानको जोखिम न्यूनीकरण, राहत र उद्धारका लागि विपद् व्यवस्थापन महाशाखा प्रमुख राजेन्द्र प्रधानको संयोजकत्वमा सहकार्य समन्वय समिति गठन गरेको छ । खाद्य व्यवस्थापनतर्फ रामहरि कोइराला, बसोबास (सेल्टर) व्यवस्थापनमा दुर्गाप्रसाद खतिवडा, सुरक्षा व्यवस्थापनमा राजन पौडेललाई जिम्मेवारी दिएको छ ।

बैठकले स्वास्थ्य, पोषण, औषधि तथा स्वच्छता व्यवस्थापनका लागि रमेश कार्की, सरसफाई, विपद् व्यवस्थापनमा हीरा यादव, पूर्वाधार व्यवस्थापनमा गोपाल पोखरेल, प्रशासनिक व्यवस्थापनमा अर्जुन थपलिया र सञ्चार व्यवस्थापनमा मीनकुमार नवोदितलाई तोकिएको छ ।
बैठकमा महानगर प्रमुख नागेश कोइरालाले जिउ धनको सुरक्षालाई पहिलो प्राथमिकतामा राख्‍न आग्रह गरेका छन् । उनले गठित समितिहरूले समेत महानगरवासीको जीउधनको सुरक्षालाई प्राथमिकता दिन निर्देशन दिएका हुन् । जोखिमयुक्त क्षेत्रमा बसोबास गर्ने नागरिकलाई सुक्षित स्थानमा सार्नका लागि वडाका जनप्रतिनिधिहरूसँग समेत समन्वय गरिने बताए । त्यसैगरी उपप्रमुख कार्कीले बाढी र डुबानबाट विस्थापितहरुको व्यवस्थापनमा महानगर केन्द्रित भएको बताइन् । उनले स्थानीय संघसंस्थाहरूसँग समेत सहकार्य गरेर विपद्को सामना गर्नुपर्ने बताइन् ।

वडाध्यक्षहरूले भने कोशी राजमार्गका विभिन्‍न स्थानमा पुराना कल्भर्टहरू मासिएका कारण पानी थुनिएर डुबानको समस्या बढेको भन्दै आक्रोश पोखेका छन् ।
यसैबीच महानगरपालिकाले बाढी जन्य प्रकोपको जोखिमलाई मध्यनजर गर्दै असार १७ गतेसम्म तीन दिन विद्यालय बन्द गर्ने निर्णय गरेको छ । वडाध्यक्षहरूसहितको बैठकले बुधबारदेखि लागु हुने गरी सामुदायिक र संस्थागत विद्यालयहरु बन्द गर्ने निर्णय भएको मेयर कोइरालाका प्रेस संयोजक मीनकुमार नवोदितले जानकारी दिए ।