दमकमा रोकिएको जग्गा कित्ताकाट केहि दिनभित्रैमा सुचारु

दमक । दमकमा रोकिएको जग्गा कित्ताकाट केहि दिनभित्रैमा सुचारु हुने भएको छ ।

दमक नगरपालिकाका प्रमुख राम थापा र उपप्रमुख रेगिना भट्टराईले बिहीवार भूमि व्यवस्था, सहकारी तथा गरिबी निवारण मन्त्रालय पुगेर रोकिएको कित्ताकाट खुलाउनेबारे कुराकानी गरेका थिए ।

मन्त्रालयका उपसचिव काजीबहादुर विष्टलाई नगर प्रमुख र उपप्रमुखले लामो समयदेखि कित्ताकाट रोकिँदा नागरिकहरुलाई ब्यवहारिक कठिनाई भएको र राजस्वमा समेत कमी आएको जानकारी गराएका थिए ।साथै दमक नगरपालिकाले जग्गाको वर्गीकरण गरेर सिफारिस समेत पठाईसकेको अवस्थामा कित्ताकाट रोकिँदा समस्या भएको बताएका थिए ।

जवाफमा मन्त्रालयका उपसचिव विष्टले प्रक्रिया पुर्याएर तत्कालै कित्ताकाट खोलिने जानकारी गराएको उपप्रमुख भट्टराईले बताइन् । आफूहरु अहिले नगरका बिभिन्न कामका लागि काठमाण्डौमा रहेको भन्दै उनले दमक फर्केलगत्तै कित्ताकाट कार्यान्वयन हुने जानकारी दिइन् ।