४ करोडको सीमा हट्यो, १२ करोडभन्दा बढी नपाइने

काठमाडौ: नेपाल राष्ट्र बैंकका गभर्नर महाप्रसाद अधिकारीले आर्थिक वर्ष २०७९/८० को वार्षिक मौद्रिक नीति सार्वजनिक गरेका छन् । मूल्यमा परेको चाप तथा बढ्दो शोधनान्तर घाटा लगायतलाई प्रमुख रूपमा राखेर मौद्रिक नीति सार्वजनिक गरिएको हो ।

राष्ट्र बैंकले गत आवको मौद्रिक नीति मार्फत राष्ट्र बैंकले बैंक तथा वित्तीय संस्थाहरूबाट सेयर धितोमा प्रवाह हुने मार्जिन प्रकृतिको कर्जामा जोखिम न्यूनीकरण गर्दै साना लगानीकर्ताहरूको पहुँच अभिवृद्धि गर्ने अभिप्रायले भन्दै उक्त सीमा लगाएको थियो । सो सीमालाई केन्द्रीय बैंकले २०७९/८० को मौद्रिक नीतिमा परिवर्तन गरेको छ। मार्जिन प्रकृतिको सेयर धितो कर्जामा लगाएको प्रतिव्यक्ति प्रति बैंकको सीमामा संशोधन गरी कुल १२ करोडको सीमालाई यथावत राखेको छ ।

उक्त कर्जा एक व्यक्ति वा संस्थाले एक वित्तीय संस्थाबाट अधिकतम ४ करोड लिने व्यवस्था हटाउँदै प्रति व्यक्ति १२ करोडको सीमा राख्दै एक बैंकबाट नै उक्त सीमासम्म कर्जा लिनसक्ने व्यवस्था गरेको छ । उक्त सीमाभन्दा बढी कर्जा उपभोग गरिरहेको अवस्थामा यस्तो कर्जा तोकिएको सीमाभित्र ल्याउन २०७९ असार मसान्तसम्मको समयावधि प्रदान भएको थियो ।