बिर्तामोडको कृषि बजारमा ३ सय टन क्षमताको कोल्डरुम बन्दै कृषिमन्त्रीले शिलान्यास

झापा ,  बिर्तामोडको कृषि बजारमा कोल्डरुम निर्माण हुन थालेको छ

१ नं प्रदेश सरकारको २ करोड र कृषि बजार व्यवस्थापन समितिको साढे ६२ लाख रुपैयाँको लागतमा ३०० टन क्षमताको कोल्डरुम निर्माण हुन थालेको हो । जसको आज एक समारोहका बीच प्रदेश सरकारका कृषिमन्त्री झलकसिंह दर्लामी मगर सन्देशले शिलान्यास गरे । आगामी असार मसान्तभित्र सम्पन्न गर्नेगरी यज्ञ कन्स्ट्रक्सनले निर्माणको ठेक्का पाएको छ ।

बिर्तामोडमा एकमात्र रोयल कोल्ड स्टोरेज रहेको छ । बाह्रै महिना भरिभराउ हुने गरेको सो कोल्ड स्टोरेजमा कृषक तथा व्यवसायीहरुले भनेको बेला आफ्ना सामान राख्न पाइरहेका छैनन् । त्यही समस्यालाई लिएर खासगरी बिर्तामोड कृषि बजारका कृषक र व्यवसायीका लागि कोल्डरुम निर्माण गर्न थालिएको संचालक समितिका सदस्य खगेन्द्र महत्तोले बताए । हाल ३०० टन क्षमताको बन्ने भएकोमा पछि त्यसलाई क्षमता विस्तार गरिने उनले जानकारी दिए ।

कृषि बजार व्यवस्थापन समिति बिर्तामोडका अध्यक्ष कमल पौडेलको अध्यक्षतामा भएको कार्यक्रममा प्रदेश कृषि मन्त्रालयका सचिव मेघनाथ तिमल्सिना , कृषि मन्त्रालयका पूर्व महाशाखा प्रमुख डा. राजेन्द्र उप्रेती , नेकपा माओवादी केन्द्रका प्रदेश सदस्य ज्योतिसिंह दर्लामीलगायतले शुभकामना मन्तव्य राखेका थिए ।

बिर्तामोडको कृषि बजारलाई नमूना बजार बनाउन कोल्डरुम एउटा आधार बन्ने बजार व्यवस्थापन समितिका अध्यक्ष पौडेलले बताए । उनले बजारलाई व्यवस्थित पार्न डिपिआर बनाइसकेको र त्यसकै आधारमा काम शुरु गरिएको जानकारी दिए । संचालक समितिका सदस्य पुष्पा दाहालले स्वागत मन्तव्य राखेको कार्यक्रमको संचालन अर्का सदस्य हरि सेलवालले गरेका थिए ।