भद्रपुरको प्रमुखमा काँग्रेसका पोखरेल र उपप्रमुखमा राप्रपाकी कार्की विजयी

भद्रपुर, स्थानीय तह निवार्चनअन्तर्गत भद्रपुर नगरपालिकाको नगर प्रमुखमा नेपाली काँग्रेसका उम्मेदवार गणेश पोखरेल निर्वाचित भएका छन् ।

भद्रपुरका नगर प्रमुख पदका लागि भएको निर्वाचनमा १२ हजार ५ सय २५ मतका साथ नेपाली काँग्रेसका उम्मेदवार गणेश पोखरेल निर्वाचित भएका हुन् । नेकपा एमालेका उम्मेदवार असारु राजवंशी ९ हजार ७ सय ५९ मतका साथ उपविजेता भएका छन् भने राष्ट्रिय प्रजातन्त्र पार्टीका उम्मेदवार नवराज पनेरुले ६ हजार ३ सय १० मत प्राप्त गरेका छन् । त्यसैगरी क्रमशः राष्ट्रिय जनमुक्ति पार्टीका यामबहादुर लिम्बुले ६ सय ८, जनता समाजवादी पार्टी, नेपालका समरकुमार राईले ३ सय ६१, मंगोल नेशनल अर्गनाइजेसनका ईन्द्रकुमार सुहाङले ३ सय, संघीय लोकतान्त्रिक राष्ट्रिय मञ्चका बिष्णु कर्मकारले ३४, मौलिक जरोकिलो पार्टीका चुडामणि अधिकारीले ३१ प्राप्त गरेका छन् ।

त्यसैगरी नगर उप–प्रमुख पदमा राष्ट्रिय प्रजातन्त्र पार्टीका राधा कार्की ९ हजार २ सय ३० मत प्राप्त गरी विजयी भएकी छन् भने नेपाल कम्युनिष्ट पार्टी (माओवादी केन्द्र) का उम्मेदवार शिवकुमार राजभण्डारी ८ हजार ५ सय ३३ मतका साथ उपविजेता भएका छन् । नेपाल कम्युनिष्ट पार्टी (एमाले)की कौशल्या अधिकारीले ८ हजार ४ सय ३, जनता समाजवादी पार्टी, नेपालकी नुतन झाले ४ सय ३०, राष्ट्रिय जनमुक्ति पार्टीकी मञ्जु वर्माले ३ सय ४१, मंगोल नेशनल अर्गनाइजेसनकी यमकुमारी लिम्बूले ३ सय ३६, मौलिक जरोकिलो पार्टीकी कृष्णदेवी चुडाल ओलीले ३८ मत प्राप्त गरेका छन् ।

भद्रपुर वडा नं १० मा नेपाल कम्युनिष्ट पार्टी (एमाले) का टेकबहादुर खड्का १ हजार ४ सय ८० मतका साथ प्यानलै विजयी भएका छन् । जसमा महिला सदस्यमा संगीता ढकालले १ हजार ४ सय ६४, दलित महिला सदस्यमा कमला अछामीले १ हजार ५ सय ३, तुलसी पोख्रेलले १ हजार ४ सय ८८ र दुर्गाप्रसाद दाहालले १ हजार ३ सय ४ मत प्राप्त गरेका छन् ।
निर्वाचनका लागि ५१ हजार २ सय ६० कुल मतदाता रहेको भद्रपुर नगरपालिकामा ३४ हजार २८ मत खसेको थियो ।