तेश्रो त्रैमासमा फर्स्ट माईक्रोफाइनान्सको व्यवसाय सँगै खुद नाफामा वृद्धि

काठमाडौं: फर्स्ट माईक्रोफाइनान्स लघुवित्त वित्तिय संस्था लिमिटेड (FMDBL) ले आर्थिक वर्ष २०७८/७९ को तेश्रो त्रैमासको वित्तिय विवरण प्रकाशित गरेको छ। विवरण अनुसार कम्पनीले यस त्रैमास सम्ममा रु.१६.६१ करोड खुद नाफा आर्जन गरेको छ। खुद नाफा अघिल्लो आर्थिक वर्षको तेश्रो त्रैमासको तुलनामा ६९.७२% ले बढि रहेको छ। खुद नाफा बढेसँगै कम्पनीको प्रति शेयर आम्दानी पनि रु.११.८९ बाट बढेर रु.२२.९७ कायम हुन आएको छ।

व्याज आम्दानीमा उलेख्य ११३.९९% को वृद्धि, खुद व्याज आम्दानीमा ६५.३७% को वृद्धि तथा संचालन नाफामा ६१.६४% को वृद्धिले गर्दा कम्पनीको खुद नाफामा उलेख्य वृद्धि आएको हो।

रु.९६.४४ करोड चुक्ता पूंजी रहेको थोक कर्जा प्रवाह गर्ने लघुवित्तको जगेडा तथा कोष ३९.७३% ले वृद्धि भएर रु.३२.६३ करोड पुगेको छ। हाल जगेडा तथा कोष र चुक्ता पूंजीको अनुपात ३३.८४% रहेको छ। यस्तै, लघुवित्तको कुल शेयरधनीकोष पनि वृद्धि भएर रु.१.२९ अर्ब कायम भएको छ जसले गर्दा प्रति शेयर किताबी मुल्य रु.१२६.६४ बाट बढेर रु.१३३.८४ कायम हुन आएको छ।

त्यस्तै, व्यवसाय तर्फ लघुवित्तले राम्रो प्रगती गरेको छ। निक्षेप संकलन गर्न नपाउने यस लघुवित्तले तेश्रो त्रैमासमा विभिन्न बैंक वित्तिय संस्थाहरु बाट रु.९.५४ अर्ब कर्जा सापट लिई रु.१०.४१ अर्ब कर्जा प्रवाह गरेको छ। पूंजी संकलन र कर्जा प्रवाह अघिल्लो वर्षको सोही अवधिको तुलना मा क्रमश ६.९४% र २५.९३% को वृद्धि रहेको छ।