एसपीपीमा सहभागीताको लागि नेपाली सेनाले पठाएको पत्र सार्वजनिक

काठमाडौं । नेपाली सेनाले स्टेट पाटर्नसिप प्रोग्राम (एसपीपी) मा सहभागी हुन अमेरिकालाई पत्र पठाएको खुलेको छ । तत्कालीन प्रधानसेनापति राजेन्द्र क्षत्रीले सन् २०१५ अगस्ट २७ मा तत्कालीन अमेरिकी राजदूतलाई पठाएको पत्र बिहीबार  सार्वजनिक भएको हो ।

सेनाले २०७२ कात्तिक १० गते नेपालको लागि तत्कालिन अमेरिकी राजदूत एलिना बी. टिप्लिट्जलाई पत्र लेखि एसपीपीमा सहभागी हुन अनुरोध गरेको पाइएको हो । पत्र तत्कालिन नेपाली सेनाका प्रधानसेनापति राजेन्द्र क्षेत्रीले राजदूतलाई सम्बोधन गरी लेखेका छन् । पत्र सेनाले परराष्ट्र मन्त्रालय मार्फत नपठाई सिधै राजदूतलाई सम्बोधन गरी पठाएको छ भने वोधार्थ रक्षा मन्त्रालय र परराष्ट्र मन्त्रालयलाई दिएको छ ।

सेनाले एसपीपीमा सहभागी हुन अमेरिकालाई पत्र लेख्दा देशको प्रधानमन्त्री केपी शर्मा ओली रहेका थिए । ओली नयाँ संविधान जारी भएपछि २०७२ असोज २५ गते पहिलो पटक देशको प्रधानमन्त्री बनेका थिए । ओली प्रधानमन्त्री बनेको १५ दिनपछि सेनाले अमेरिकी राजदूतलाई एसपीपीमा सहभागी हुन पत्र लेखेको थियो ।

पहिलो बुँदामा लेखिएको छ – ‘नेपाल सरकारको निर्देशन बमोजिम नेपालको लागि निकट भविष्यमा ‘नेशनल गार्ड स्टेट पार्टनरसीप प्रोग्राम (एनजीएसएसपी)’ स्थापनाको औपचारिक अनुरोध गर्न पाउनु हाम्रो लागि गौरवको विषय हो । ‘

यसअघि नेपाली सेनाले एक विज्ञप्ति जारी गर्दै सपीपी सम्झौताको प्रक्रियामा नेपाली सेना सहभागी नभएको दावी गरेको थियो । यस्तै बिहीबार नै गृहमन्त्री बालकृष्ण खाणले सरकारले एसपीपीसँग आवद्ध हुने सोचसमेत नराखेको बताएका थिए । उनले भनेका थिए – ‘एसपिपी कार्यक्रममा नेपाल आवद्ध भएको छैन, यससम्बन्धी कुनै निर्णय गरेको छैन, निर्णय गर्ने सोच राखेको पनि छैन, यसमा सुस्पष्ट रुपमा प्रतिबद्धता राख्न चाहन्छु’