न्युनतम मापदण्डसमेत पालना नगरी रंगशाला निर्माण

बिर्तामोड: प्रस्तावित अर्जुनधारा रंगशालामा योजनाविना नै निर्माणको काम थालिएको छ । विस्तृत परियोजना प्रतिवेदन (डीपीआर) तयार नगरी निर्माण गरेको भन्दै स्थानीयले विरोध जनाएका छन् । अर्जुनधारा नगरपालिका–७ मा स्थानीय समाज उद्दार कल्याण संघले रंगशाला निर्माण सुरु गरेको हो ।
संघले युवा तथा खेलकुद मन्त्रालय र नगरपालिकाबाट रकम जुटाएको छ । २ बिघा नम्बरी तथा ३ बिघा ८ कट्ठा सरकारी गरी ५ बिघा ८ कट्ठा जमिनमा संघले रंगशाला बनाइरहेको छ । तर, उसले रंगशाला निर्माणका लागि न्युनतम मापदण्डसमेत पालना नगरेको भन्दै स्थानीयले विरोध गरेका हुन् ।
संस्थाले तीन वर्षदेखि रंगशाला घेराबाराको काम गरिरहेको छ । डीपीआर नहुँदा रंगशालामा कतिवटा गेट राख्नुपर्ने, उपयुक्त स्थान कहाँ हुने, शौचालय, काउन्टर, कार्यालय, चेन्जिङ रुमलगायतका भौतिक संरचना कुन स्थान र कति संख्यामा बनाउनुपर्नेबारे संस्थाका पदाधिकारीलाई जानकारीसमेत छैन ।

माटो परीक्षणसमेत नगरी रंगशाला जस्तो ठूलो परियोजनामा संरचना निर्माण थाल्नु राज्यको ढुकुटीको चरम दुरुपयोग भएको भन्दै स्थानीय सञ्जय थापाले आक्रोश व्यक्त गरे ।
योजनाविनाको रंगशाला निर्माणमा तीन वर्षयता एक करोड २० लाख रुपैयाँ खर्च भइसकेको छ । यसमा युवा तथा खेलकुद मन्त्रालयको ८३ लाख र अर्जुनधारा नगरपालिकाको करिब ३५ लाख रुपैयाँ खर्च भएको हो । एक करोड २० लाख खर्च हुँदासमेत रंगशाला घेराबाराको काम पनि सम्पन्न नभएको नगरपालिकाका इन्जिनियर नीरज अधिकारीले बताए । ‘रंगशालामा तीन वर्षदेखि घेराबाराको काम भइरहेको छ तर यो वर्ष पनि पूरा हुने अवस्था छैन,’ उनले भने, ‘आगामी वर्षदेखि डीपीआर नबनाई नगरपालिकाले रंगशाला निर्माणका लागि बजेट छुटयाउँदैन ।’

स्थानीयले रंगशाला निर्माणमा गुणस्तरीय कामसमेत नभएको आरोप लगाएका छन् । ‘सोयल टेस्टबिनै गरिएको निर्माणको काम कति पक्का हुन्छ भन्ने यसै पनि अनुमान लगाउन सकिन्छ,’ निवर्तमान वडाध्यक्ष नवीन ढुंगानाले भने । संस्थाले आफ्नो स्वामित्वमा रहेको दुई बिघा जग्गा रंगशाला निर्माण गर्न भन्दै २०७६ मा नगरपालिकालाई दिने लिखित सहमति गरेको छ । सहमतिअनुसार उक्त जग्गामा नगरपालिकाले रंगशाला निर्माणको काम गर्नुपर्ने उल्लेख छ । तर तीन वर्षदेखि रंगशाला निर्माणको काम संस्थाका पदाधिकारी आफैंले गर्दै आएका छन् ।

नगरपालिकासँग सहमति एकखाले छ । कामचाहिँ अर्कै किसिमले भइरहेको छ । यसले हामी स्थानीयलाई अचम्मित मात्र होइन, सशंकित पनि बनाएको छ,’ स्थानीय कुमार भट्टराईले भने ।

संस्थाका अध्यक्ष धर्मानन्द गुरागाईंले स्थानीयको सुझाव सल्लाहअनुसार नै रंगशाला निर्माणको काम भइरहेको दाबी गरे । ‘धेरै दु:ख र लडाइँ गरेर रंगशालाका लागि बजेट ल्याउन सफल भयौं । कुनै काम आफूखुसी गरेका छैनौं,’ उनले भने । उनले घेराबाराको काम सकिन लागेको र अब प्यारापिट, कभर्डहल, शौचालय, चेन्जिङ रुमलगायतका काम सुरु गर्ने बताए ।

संस्थाका सचिव मेदनीप्रसाद ढुंगेलले ७ करोड ४३ लाख रुपैयाँको गुरुयोजनाअनुसार रंगशाला निर्माणको काम थालेको बताए । उनले सबै काम प्राविधिकबाट स्वीकृत गराएरै गरिरहेको दाबी गरे । समाज उद्दार कल्याण संघ नगरपालिकाभित्रको एक सामाजिक संस्था हो । सामाजिक कार्य गर्न स्थानीयले २०५० सालमा संस्था गठन गरेका थिए ।

अर्जुनधारामा जिल्लाकै पुरानो शनिश्चरे बजार छ । उक्त बजारदेखि करिब एक किलोमिटर पश्चिममा विरिङ नदी छ । दुई दशकअघि नदीमा पक्की पुल थिएन । २०६४/६५ तिर स्थानीयको मागअनुसार तत्कालीन जिल्ला विकास समितिको १५ लाख र साबिक अर्जुनधारा गाविसको ५ लाख गरी २० लाख रुपैयाँमा नदीमा पुल निर्माण थालिएको थियो । पुल निर्माणपछि ४ लाख रुपैयाँ बचत भएको थियो । उक्त रकम स्थानीय क्षेत्रको सामाजिक कार्यमा खर्चिने भन्दै पुल निर्माण समितिले समाज उद्दार कल्याण संघमा राखेका थिए ।

सोही रकमबाट खेलमैदान निर्माणका लागि भन्दै संस्थाले नदी किनारको दुई बिघा जग्गा खरिद गरेको थियो । खरिद गरेको जग्गासँगै रहेको थप ३ बिघा ८ कट्ठा जग्गा पनि संस्थाले नै संरक्षण गर्दै आएको छ । संस्थाको २ बिघा र सरकारी ३ बिघा ८ कट्ठा जग्गामा रंगशाला निर्माणको काम भइरहेको हो ।