पाल्पा: जुठापौवा पानीडाँडामा शुक्रबार बेलुकी भएको बस दुर्घटनामा दुई जनाको मृत्यु भएको छ । दुर्घटनामा चार बालक घाइते भएका छन् । रैनादेवी छहरा गाउँपालिका–६, जुठापौवा पानीडाँडाबाट जुठातर्फ आउँदै गरेको बस धारापानीमा भीरबाट खस्दा दुई जनाको मृत्यु भएको हो । रैनादेवी छहरा–६, जुठापौवाका ४२ वर्षीय वेदबहादुर जीसी, ८ वर्षीय बालक अशोक रास्कोटीको मृत्यु भएको प्रहरीले जनाएको छ ।
ग १ ख ४९०२ नम्बरको बस सडकबाट झण्डै ४ सय मिटर तल खसेको प्रहरी नायव उपरीक्षक वीरेन्द्र थापाले बताए । दुर्घटनापछि स्थानीय बासिन्दा र प्रहरीले उद्धार गरी घाइतेहरुलाई तानसेन पठाएका छन् । घाइतेको तानसेनस्थित लुम्बिनी मेडिकल कलेजमा उपचार भइरहेको कलेजका सूचना अधिकारी कृष्ण पराजुलीले बताए ।
दुर्घटनामा जुठाका ७ वर्षीय मिलन बगाले, ८ वर्षका श्रीधर घर्ती, ७ वर्षका रोमन घर्ति र ८ वर्षका रोहित घर्ती रहेका छन् । दुर्घटनाका सम्बन्धमा थप अनुसन्धान भइरहेको प्रहरीले जनाएको छ ।
बस चालक प्रहरी नियन्त्रणमा रहेका छन् । मृतक जीसी गाडी मालिक हुन् । दुर्घटनास्थल सदरमुकाम तानसेनबाट ४५ किलोमिटर टाढा छ ।
