मकवानपुर: निर्वाचन लक्षित साना योजनाहरु वितरण गरेपछि विवादमा परेको बागमती प्रदेश सरकार विरुद्ध अख्तियारमा उजुरी परेको छ । प्रदेश सरकारले कानुनविपरीत पाँच लाख रुपैयाँको टुक्रे योजनाका लागि रकमान्तर गरेको भन्दै अख्तियार दुरुपयोग अनुसन्धान आयोगको क्षेत्रीय कार्यालय हेटौंडामा उजुरी परेको हो। आसन्न स्थानीय तहको निर्वाचनलाई समेत असर पर्ने गरी बागमती प्रदेश सरकारले कानुनविपरीत टुक्रे योजनामा रकमान्तर गरेको थियो ।
स्थानीय तहलाई छलेर उपभोक्ता समितिमार्फत पाँच लाख रुपैयाँका टुक्रे योजना वितरण गरिएको उजुरीमा उल्लेख छ । बागमती प्रदेश सरकारले चालु आर्थिक वर्षका लागि विनियोजित कार्यक्रमभन्दा बाहेक साना योजनाहरु वितरण गरेको थियो । यस्ता योजनाहरु २ हजार २ सय ९९ योजनामा थिए । यी सबै योजनाहरुको लागि बजेट रकमान्तर गरेर अन्यत्रबाटै ल्याइएको थियो ।
उक्त सबै रकम गत ६ फागुन २०७८ मा बसेको मन्त्रिपरिषद् बैठकले बजेट रकमान्तर गरेको हो। संविधानको धारा २३२ विपरीत स्थानीय तहलाई छलेर उपभोक्ता समितिमार्फत विकास निर्माणको काम अघि बढाउने सरकारको निर्णय संविधान र कानुनविपरीत भएको अख्तियार दुरुपयोग अनुसन्धान आयोग जनाएको छ।
प्राविधिक अध्ययन, लागत अनुमान र सम्भाव्यता नै अध्ययन नगरी स्थानीय तहले गर्दै आएको काममा दोहोरो हुने गरी प्रदेश सरकारले बजेट वितरण गरेको निवेदनमा उल्लेख भएको आयोगका सूचना अधिकारी विष्णु प्रसाद सापकोटाले जानकारी दिए ।
निवेदनउपर अख्तियारले छानबिन गर्ने सूचना अधिकारी सापकोटाले बताए । प्रदेश सरकार कार्यकर्तालाई फकाउने गरी साना योजनामा बजेट रकमान्तर गरेको भन्दै प्रमुख प्रतिपक्ष दल एमालेले सरकारको विरोध गर्दै आएको छ।
यता आवश्यकता भन्दा बढी सङख्यामा मन्त्रालयहरु फुटाइएपछि विवादमा आएका मुख्यमन्त्री राजेन्द्र पाण्डेले मन्त्रालयका कर्मचारीहरुलाई अघिल्लो सरकारले विनियोजन गरेको बजेट र तय गरेका कार्यक्रमहरु अघि नबढाउन उर्दी जारी गर्दै आएको कर्मचारीहरुले गुनासो गरेका छन् । मन्त्रालयका सचिवहरुले समेत मन्त्रालय फुटाएपछि कार्यप्रगती उल्लेख्य नभएको स्वीकार सार्वजनिक कार्यक्रमहरुमै गर्दै आएका छन् ।
