वीरगन्ज महानगरपालिकाद्वारा घरदैलो स्वास्थ्य सेवा सुरु

वीरगन्ज । वीरगन्ज महानगरपालिकाले घरदैलो स्वास्थ्य सेवा शुरु गरेको छ । वीरगन्ज महानगरपालिकाका जनताको स्वास्थ्य उपचार सेवाको पहुँच सहज बनाउने उद्देश्यले वीरगंज माहानगरपालिकाले घरदैलोमा स्वास्थ्य सेवा सुरु गरेको हो ।

महानगरपालिकाका नगर प्रमुख विजय कुमार सरावगीले नगरवासीको घरदैलोमै पुगेर स्वास्थ्य अवस्थाको बारेमा जानकारी लिदै बिरामीहरूलाई औषधि वितरण गरी स्वास्थ्य उपचार सेवाको शुरुवात गरेका हुन् । नागरिकको स्वास्थ्यमा पहुँच बढाउन तथा असहाय, असक्त, वृद्धवृद्धाहरू अस्पतालसम्म पुग्न नसकी स्वास्थ्य उपचारमा हुने कठिनाइलाई मध्यनजर गर्दै घरदैलो स्वास्थ्य सेवा सुरु गरिएको वीरगन्ज महानगर प्रमुख विजय कुमार सरावगीले बताए ।

अस्पतालको पहुँचभन्दा बाहिर रहेका विपन्न, गरिब, असहाय, असक्त तथा वृद्धवृद्धाहरूलाई घरदैलोमा नै पुगेर स्वास्थ्य सेवा दिने उद्देश्यले महानगरपालिकाका स्वास्थ्यकर्मीहरू खटाएर सेवा सुरु गरिएको नगरप्रमुख सरावगीले बताए । गएको स्थानीय तहको निर्वाचन अघि आपूmले घोषणा पत्रमा गरेको प्रतिबद्धताअनुसार महानगरवासीको घर घरमा स्वास्थ्य सेवाको पहुँच पु¥याइएको बताए ।
महानगरपालिकाले उपलब्ध गराउने स्वास्थ्य सेवाअन्तर्गत बालबालिकाहरूको नियमित खोप दिएर महानगरलाई पूर्ण खोप घोषणा गरिसकेको छ ।

छिट्टै पूर्ण साक्षर महानगर घोषणाको तयारीमा रहेको पनि नगर प्रमुख सरावगीले बताए । त्यस्तै महानगर प्रमुख सरावगीले महानगर भित्र निर्माण हुन लागेको नगर स्वास्थ्य केन्द्रको पनि शिलान्यास गरेका छन् ।महानगरपालिकाले पाँचवटा वडामा स्वास्थ्य केन्द्र निर्माण गर्दैछ । महानगरपालिकाद्वारा निर्माण गर्न लागेको दुईवटा नगर स्वास्थ्य केन्द्रको मंगलबार एकैदिन महानगर प्रमुख सरावगीले शिलान्यास गरेका हुन् ।

महानगरपालिकाको वडा नम्बर–१७ अलौं र वडा नम्बर–२६ सुगौली बिर्तामा ३ करोड ६२ लाख रुपैयाँको लागतमा निर्माण गर्न लागिएको नगर स्वास्थ्य केन्द्रको पक्की भवन निर्माणको नगरप्रमुख विजयकुमार सरावगीले शिलान्यास गरेका हुन् ।
महानगरपालिकाले यसअघि दुईवटा वडामा स्वास्थ्य केन्द्र निर्माण सम्पन्न गरेर सेवा शुरु गरेको छ । त्यस्तै बर्थिङ सेण्टरहरू पनि निर्माण गरिरहेको छ ।