फौजी किराले इलामका मकैबारी सखाप, किसान चिन्तित बनेका छन् ।

इलाम- फौजी किराको प्रकोप बढेपछि इलामका किसान चिन्तित बनेका छन् । जिल्लाका अधिकांश क्षेत्रमा लगाएको मकै बालीमा फौजी किराले क्षति पु-याएको छ । किराको हुलले मकैको पात, गुभा र डाँठ समेत खाएपछि मकैबारी नै सखाप बनेको छ । जिल्लाका सबैजसो स्थानमा फौजी किराको प्रकोप देखिएको छ ।

देउमाई, माई, चुलाचुली, फाकफोकथुम, माइजोगमाई, इलाम नगरपालिका लगायत धेरै क्षेत्रमा फौजी किराको प्रकोप बढेको छ । किसानहरू किरा नियन्त्रणका लागि विषादी लिन कृषि ज्ञान केन्द्रसम्म पुग्ने गरेका छन् । तर जिल्लाभरि नै किराको प्रकोप फैलिएकाले आवश्यक मात्रामा औषधि समेत नपाइएको गोलाखर्कका किसान दुर्गा बहादुर गोलेले बताउनुभयो ।

कृषि ज्ञान केन्द्र इलामले किरा नियन्त्रणको लागि पालिकाका सम्बन्धित कृषि शाखामा निःशुल्क विषादी पठाइएको दावी गरेको छ । तर, किसानहरू भने पर्याप्त विषादी नपाएको गुनासो गर्छन् । केही वर्षदेखि मकै बालीमा अमेरिकि फैजी किराको प्रकोप देखिएपछि सरकारले यसको नियन्त्रण तथा रोकथामका लागि अभियान चलाएको छ ।