बोनस शेयर सूचिकृत हुँदा पनि पोर्टफोलियो बढेन

काठमाडौ: बोनस शेयर आशामा शेयर खरिद गर्नेहरु खातामा बोनस शेयर सूचिकृत हुँदा पनि नोक्सानमा देखिएका छन् । यसरी बोनस शेयर खातामा आउदा पनि पोर्टफोलियो बढ्न नसक्दा लगानीकर्ताहरु अहिले तनावमा छन् ।

नेपालको शेयर बजारमा बोनस शेयर र हकप्रद शेयरको घोषणाले शेयर मूल्य बढ्ने गरेको छ । गत भदौ २ गते नेप्से सूचक सर्वाधिक उचाइमा पुगेर घट्ने क्रममा अधिकाम्स लगानीकर्ता नोक्सानमा छन् । अझ दशै तिहार पछि बैंक वित्तीय संस्था तथा सूचिकृत कम्पनीहरुले दिएको बोनस शेयर खातामा आउदा पनि पोर्टफेलियो बढ्न सकेको छैन ।

भदौ भन्दा अगाडी शेयर खरिद गरेकाहरु मध्ये कुनै पनि लगानीकर्ताको पोर्टफेलियो नाफामा छैन । साथै दशै तिहार पछि लाभांश घोषणा गरेका कम्पनीको बुक क्लोज अगाडी शेयर खरिद गर्नेहरुको खातामा बोनस शेयर सूचिकृत हुँदा पनि नाफामा नदेखिदा लगानीकर्ता आत्तीएका छन् ।

प्रभु बैंकको १२ प्रतिशत बोनस शेयर दोस्रो बजारमा सूचिकृत भइसकेको छ । उक्त बोनस शेयरको बुक क्लोज पछि मूल्य समायोजन हुँदा शेयर मूल्य २८८ रुपैयाँमा भयो । हाल बैंकको शेयर मूल्य २९९ रुपैयाँ छ । यदि बुक क्लोज अगाडी प्रभु बैंकको शेयर ३३० रुपैयाँ हाराहारीमा खरिद गरिएको थियो भने मात्रै अहिले बिक्री गर्दा फाइदा हुन्छ । तर ३३० रुपैयाँ भन्दा माथिल्लो मूल्यमा खरिद गरिएको छ भने बोनस शेयर खातामा आउदा पनि लगानीकर्ताहरु घाटामा छन् । प्रभु बैंकको शेयर मूल्य एक वर्षको अवधिमा ५१९ रुपैयाँसम्म पुगेको थियो । शेयर बजार अधिकतम बिन्दुमा पुगेको समयमा खरिद गरेर बिक्री गरिएको थिएन भने अहिले चरम घाटा छ ।

त्यस्तै ग्लोबल आइएमई बैंकले १० प्रतिशत बोनस शेयर घोषणा पछि मूल्य समायोजन हुँदा शेयर मूल्य ३१६ रुपैयाँ थियो । अहिले ३१९ रुपैयाँ छ । यदि ग्लोबल आइएमई बैंकको शेयर बुक क्लोज अगाडी ३६५ रुपैयाँ खरिद गरिएको थियो भने मात्रै बोनस शेयर हातमा पर्दा थोरै फाइदा हुन्छ । ३६५ रुपैयाँ भन्दा माथिल्लो मूल्यमा शेयर खरिद गर्नेहरु अहिले चरम नोक्सानमा छन् ।

नेपाल बैंकको १४ प्रतिशत बोनस शेयर घोषणा पछि मूल्य समायोजन भएर ३६८ रुपैयाँ कायम भएको थियो । अहिले बैंकको बोनस शेयर ३३३ रुपैयाँ छ । यो भन्नुको मतलब नेपाल बैंकको शेयरधनी खातामा बोनस शेयर आउदा पनि चरम नोक्सानमा छन् ।

कृषि विकास बैंकको बोनस शेयर सूचिकृत भइसकेको छ तर पोर्टफोलियो भने नोक्सानमै छ । बैंकको बोनस शेयर घोषणा पछि बुक हुँदा शेयर मूल्य ४११ रुपैयाँ थियो तर अहिले ३९० रुपैयाँ छ ।

बुटवल पावरको १० प्रतिशत बोनस शेयर खातामा आउदा पनि नोक्सानमै छ । बुटवल पावरले बोनस शेयर घोषणा पछि बुक गर्दा मूल्य समायोजन भएर ४३२ रुपैयाँ कायम भएको थियो । अहिले कम्पनीको शेयर मूल्य ४२५ रुपैयाँ छ । शेयरधनीहरुलाई अहिले नाफा हुन कम्तिमा पनि ४३२ रुपैयाँ हुनु पर्छ ।

पछिल्लो समय सूचिकृत कम्पनीहरुको बोनस शेयर सूचिकृत हुने क्रम बढ्दो छ । तर बुक क्लोज पछि शेयर सप्लाइ बढ्ने हुँदा अझै मूल्यमा सुधार हुने संकेत देखिदैन । लगानीकर्ताहरुले बोनस शेयर र हकप्रद शेयर दिने हल्लाका पछाडी जति हौसिएर शेयर खरिद गर्छन् त्यो शेयर सूचिकृत भए पछि घटेको मूल्यमा शेयर बिक्री गर्नु पर्दा झन् निरास हुनु पर्ने अवस्था छ ।