विकास बाजेट कटाएर खोप खरिद गर्दै स्थानीय सरकार

भविन्द्र गौतम, पाल्पा, १० जेठ । राज्यको पुरै संयन्त्र लाग्दा समेत कोरोना खोप खरिद गर्न नसकेको अवस्थामा पाल्पाका स्थानीय सरकारले धमाधम कोरोना भाइरसको खरिद गर्ने योजना अगाडि बढाएका छन् । जिल्लाका दुई स्थानीय सरकार रामपुर नगरपालिका र रम्भा गाउँपालिकाले आर्फै खोप खरिदको प्रकृया सुरु गरेका हुन । रामपुर नगरपालिका स्वास्थ्य मन्त्रालयमै पुगेर खोप अनुमतीका लागि निवेदन दर्ता गराएको छ । यस्तै रम्भा गाउँपालिकाले खोप खरिदका लागि स्वास्थ्य तथा जनसंख्या मन्त्रालय संग अनुमतिकाका लागि निवेदन पठाएको जनाएको छ । रामपुर नगरपालिकाले ५० हजार र रम्भा गाउँपालिकाले २० हजार डोज खोप खरिद गर्न अनुमति मागेको हो ।

सरकारले खोप उपलब्ध गराउन समय लाग्ने देखिएपछि भारतबाट आफैंले समन्वय गरेर खोप ल्याउन स्वास्थ्य मन्त्रालयमा अनुमति मागेको रम्भा गाउँपालिकाका अध्यक्ष विष्णुप्रसाद भण्डारीले बताउनुभयो । अध्यक्ष भण्डारीका अनुसार चालु आर्थिक वर्षमा सम्झौता नभएका विकास निर्माणको योजनाको बजेटबाट मिलान गर्नेगरी खोप खरिद गर्ने योजना गाउँपालिकाले लिएको छ । ”भारतमा हाम्रो छुट्टै कुटनीति रहेकाले खोप खरिदको अनुमति पाए जसरी पनि खोप ल्याउँछौं स्थानीय सरकार पनि एउटा सरकार नै हो हामीलाई विश्वास गर्नुस” अध्यक्ष भण्डारीले भन्नुभयो । विकास जनताका लागि हो अहिलेको महामारीमा जनताको स्वास्थ्य रक्षा प्रमुख प्राथमिकता भएकोले जीवन रहे विकास अर्को वर्ष गर्ने योजनाका साथ पालिकाले काम गरेको र कोरोना भाइरस संक्रमण रोकथामका लागि स्थानीय सरकारले कुनै कसूर बाकी नराख्ने समेत अध्यक्ष भण्डारीले बताउनु भयो । कोरोनाको बढ्दो संक्रमणले जनता त्रासमा रहेको बेला कोभिड विरुद्धको लडाईलाई जित्न आवश्यक पर्ने खोप खरिदको प्रकृया स्थानीय सरकार आफ्नो सरकार भएको महसुस यहांका स्थानीयले गरेका छन् ।

मुलक संघीय संरचनामा गएपछि बनेको संरचनाले स्थानीय सरकार आफ्नो सरकार भएको महसुस भएको छ । खोप खरिदको प्रकृया सकारात्मक पक्ष रहेपनी संक्रमण रोकथामका लागि स्वास्थ्यका मापदण्ड पुरा गर्दै उच्च सतर्कता अपनाउन आवस्यक छ ।