पत्रकार सुबेदिको समाजिक कार्य: अशक्त तथा जेष्ठ नागरिक सेवा केन्द्रलाई युरोगार्ड सहयोग

पाल्पा । समाजसेवी, व्यवसायी तथा स्वतन्त्र पत्रकार संघका महासचिव जिवलाल सुबेदीले निलसागर असहाय, अशक्त तथा जेष्ठ नागरिक सेवा केन्द्र तानसेनलाई युरोगार्ड सहयोग गरेका छन । उनका स्व. माता छविकला र पिता स्व. टिकाराम सुवेदीको स्मृतिमा युरोगार्ड सहयोग गरेका हुन् ।

आश्रममा बस्ने वृद्धवृद्धाहरुको लागी स्वच्छ खानेपानी पुर्‍याउने उद्देश्यले आमाबुबाको स्मृतिमा युरोगार्ड सहयोग गरेको सुवेदीले बताए । वृद्धवृद्धाहरु आफैमा अस्वस्थ र असशक्त हुने भएकाले उनीहरुको स्वास्थ्यको हेरचाह नै महत्वपूर्ण हुने भन्दै युरोगार्ड सहयोग गरेकोे उनले बताए । युरोगार्डको प्रयोगबाट केही हदसम्म भए पनि आश्रममा बस्ने वृद्धवृद्धाहरुले स्वच्छ पिउने पानी खान पाउने विश्वास सुवेदी परिवारले व्यक्त गरे ।

युरोगार्ड ग्रहण गर्दै केन्द्रका संयोजक देवप्रसाद बज्राचार्यले वृद्धाश्रमप्रति सुवेदी परिवारले देखाएको सहयोग र सद्भाव अत्यन्त प्रशंसनिय रहेको भन्दै धन्वाद व्यक्त गरे । वृद्धाश्रमका लागि आवश्यक भवन निर्माण भइसकेको र केही काम मात्र बाँकी रहेकाले छिट्टै नै वृद्धवृद्धाहरुलाई भवनमा राखिने बताए । वृद्धाश्रम विशुद्ध सामाजिक संस्था भएकाले सबैलाई सहयोग गरिदिन उनको आग्रह थियो । उनका अनुसार वृद्धवृद्धाहरुको सेवा नै मानविय धर्म भएकाले सहयोग गर्न चाहने व्यक्ति, संघसंस्थाहरुले तानसेन भुषालडाँडामा रहेको केन्द्रमा आई सहयोग गर्न सक्ने छन ।
सुवेदी तिनाउ गाउँपालिका मस्यामका स्थायी बासिन्दा हुन । उनले पाल्पाको तानसेनमा होटल मोनिका गेस्ट हाउस सञ्चालन गरेका छन । उनको यो कार्यको सामाजिक सन्जालमा प्रसंशा गरिएको छ ।