म्यानमारमा सैन्य “कु”, नेतृ आङ सान सुची पक्राउ

म्यानमारको नेशनल लिग फर डेमोक्रेसी पार्टीकी सर्वोच्च नेतृ आङ सान सुची पक्राउ परेकी छिन् । सैन्य ‘कु’ पछि सेनाले उनलाई हिरासतमा लिएको बीबीसीले जनाएको छ । सुचीको प्रवक्ताले एक विज्ञप्तिमार्फत उनलाई सेनाले हिरासतमा लिएको जानकारी दिएका छन् ।

विगत केही समययता सरकार र सेनाबीच विवाद उत्पन्न भएको अवस्थाका बीच यो गिरफ्तारी भएको समाचारमा जनाइएको छ ।
नेशनल लिग फर डेमोक्रेसी पार्टीले गत नोभेम्बर महिनामा भएको चुनावमा भारी जित हासिल गरेको थियो । तर सेनाले चुनावी प्रक्रियामा धाँधली भएको दावी गर्दै आएको थियो ।

सेनाले सोमबार बोलाइएको संसद बैठक स्थगित गरिदिएको छ । समाचारमा जनाएअनुसार सुचीसँगै राष्ट्रपति बीन म्यिंट र अन्य शीर्ष नेताहरुलाई पनि हिरासतमा लिइएको छ । सुचीका प्रवक्ताले आफू पनि पक्राउ पर्ने खतरा उत्तिकै रहेको बताएका छन् ।

बीबीसीका अनुसार सैन्य कु पछि म्यानमारको राजधानीका साथै देशका मुख्य शहरमा बाक्लो संख्यामा सेना परिचालित भएका छन् । इन्टरनेट र टेलिफोन सेवा बन्द गरिएको छ ।

म्यानमारमा सन् २०११ सम्म पनि सैन्य शासन रहेको थियो । त्यतिबेला सुचीले लामो समय आफ्नै घरमा नै नजरबन्दमा बिताएकी थिइन् । बिबिसीको सहयोगमा ।