नेपाल पर्यटन बोर्डले निजी क्षेत्रको सथामा ट्रास्कफोर्स गठन गरेको हो।

काठमाडौं । नेपाल पर्यटन बोर्डले कोभिड १९ बाट प्रभावित पर्यटन उद्योगलाई कसरी पुनर्जीवन दिने भन्ने विषयमा सुझाव दिन टास्कफोर्स गठन गरेको छ ।

एसकेएएल, पाटालगायत सम्पूर्ण पर्यटन क्षेत्रका संघ-संस्था एवं अग्रज पर्यटन व्यवसायी समेतलाई सल्लाहकारका रुपमा समेटेर बोर्डका कार्यकारी प्रमुखको संरक्षकत्वमा पर्यटन पुनरुत्थान टास्कफोर्स गठन गरी काम सुरु गरेको बोर्डले जनाएको छ ।

कार्यदलले वर्तमान अवस्थामा थलिएको पर्यटन उद्योगलाई कसरी पुनर्जीवन दिन सकिन्छ भन्ने विषयमा अन्तर्राष्ट्रिय अभ्यासहरु समेतको अध्ययन गरी सुझावहरु निरन्तर दिने जनाइएको छ । सो सुझावअनुसार सम्पूर्ण व्यवसायीहरुलाई एकीकृत गरी सरकारलाई आगामी रणनीति निर्माण गर्न सहयोग पुर्‍याउने बोर्डले जनाएको छ । उक्त कार्यदलले तत्काल पर्यटनका गतिविधिहरुलाई सुरक्षित ढंगले कसरी अगाडि बढाउन सकिन्छ भन्ने पनि अध्ययन गर्नुका साथै निराश हुँदै गएका व्यवसायी तथा मजदुरहरुलाई के कस्तो आर्थिक कार्यक्रम ल्याउन सकिन्छ भन्ने पनि मार्ग पहिल्याउन सहयोग गर्ने जनाइएको छ ।

कोभिड १९ महामारीले नेपालीको जनजीवन तहसनहस पारेको छ भने मूलुककै अर्थतन्त्र धरासायी हुने अवस्थामा पुगेको बोर्डले जनाएको छ । देशको विदेशी मुद्राआर्जनको भरपर्दो स्रोत एवं रोजगारी सिर्जना तथा सिंगो मुलुकको अर्थतन्त्रको भविष्यको बलियो आधारका रुपमा स्थापित हुँदै गरेको पर्यटन क्षेत्र यो महामारीको सबैभन्दा ठूलो सिकार बन्‍न पुगेको छ । चैत ११ देखि लकडाउन सुरु भएयता पर्यटन क्षेत्रमा आश्रित लाखौं परिवारलाई बिचल्ली बनाएको र हजारौं व्यवसायी पलायन हुने अवस्थामा पुगेको बोर्डले जनाएको छ ।

महामारीबीच पर्यटन क्षेत्रलाई सुरक्षाको सबै विधि अपनाई सञ्चालन गर्न प्रोटोकल तयार गरी लागु गर्ने, सरकारको नीति तथा कार्यक्रम एवं बजेटमा व्यवस्था गरिएको आर्थिक प्याकेजहरुलाई नेपाल राष्ट्र बैंकलाई अनुरोध गरी पर्यटन व्यवसायीहरुको बीचमा थप स्पष्ट पार्ने कार्य गर्ने, पर्यटन मजदुरहरुलाई अल्पकालीन भए पनि रोजगार सिर्जना गर्न अन्तर्राष्ट्रिय साझेदार संस्थासँग सहकार्य गर्नेजस्ता कार्यहरु बोर्डले गर्दै आएको जनाएको छ ।