काठमाडौँ: प्रधानमन्त्री शेरबहादुर देउवाले फोहोर व्यवस्थापन गरी काठमाडौंलाई सुन्दर सहर बनाउनुपर्ने बताएका छन् । मंगलबार काठमाडौंमा आयोजित ‘राष्ट्रिय सहरी नीति, सहरी विकास ऐन र युटिलिटी करिडोर ऐन तर्जुमासम्बन्धी परामर्श गोष्ठी’ लाई सम्बोधन गर्दै प्रधानमन्त्री देउवाले काठमाडौंको फोहोर व्यवस्थापन नहुँदा सबैलाई लाजमर्दो कुरा भएको बताएका हुन् ।
फोहोर व्यवस्थापनमा विभिन्न वैकल्पिक उपाय अपाउनुपर्ने उल्लेख गर्दै प्रधानमन्त्रीले काठमाडौंलाई सुन्दर बनाउन सबै मिलेर काम गर्नुपर्ने बताए । ‘फोहोर व्यवस्थापनबाट ग्यास र बिजुली निकाल्न सकिन्छ भन्ने मैले धरानमा देखेर आएको छु,’ उनले भने, ‘यसबाट सहरका बासिन्दाले फाइदा लिन सक्नेछन् । काठमाडौंलाई सुन्दर सहर बनाउन सकिन्छ । यसमा सबै मिलेर काम गरौँ । सुन्दर सहर काठमाडौंमा जताततै फोहोर फाल्दा हामी सबैका लागि लाजमर्दो कुरा भएको छ ।’
