देउवाको किल्ला डडेल्धुरामा रास्वपाको झण्डा, ताराप्रसाद जोशी विजयी

काठमाडौं । सुदूरपश्चिमको चर्चित निर्वाचन क्षेत्र डडेल्धुरामा राष्ट्रिय स्वतन्त्र पार्टी (रास्वपा)का उम्मेदवार ताराप्रसाद जोशी प्रतिनिधिसभा सदस्यमा निर्वाचित भएका छन्।

जोशीले नेपाली कांग्रेसका उम्मेदवार नैनसिंह महरलाई ७ हजार १० मतान्तरले पराजित गर्दै जित हासिल गरेका हुन्। अन्तिम मतपरिणामअनुसार जोशीले १९ हजार १३१ मत प्राप्त गर्दा महरले १२ हजार १२१ मत प्राप्त गरेका छन्।त्यसैगरी, नेपाली कम्युनिष्ट पार्टीका मानसिंह मालले ६ हजार ८३४ मत प्राप्त गरेका छन् भने **नेकपा (एमाले)**का उम्मेदवार चक्र स्नेहीले ३ हजार २६ मत प्राप्त गरेका छन्।

डडेल्धुरा लामो समयदेखि नेपाली कांग्रेस सभापति तथा पूर्वप्रधानमन्त्री शेरबहादुर देउवाको बलियो निर्वाचन क्षेत्रका रूपमा चिनिँदै आएको थियो। तर यसपटक देउवा चुनावमा नउत्रिएपछि कांग्रेसले नैनसिंह महरलाई उम्मेदवार बनाएको थियो।

यस निर्वाचनमा भने रास्वपाका जोशीले जित निकाल्दै देउवाको किल्ला मानिने डडेल्धुरामा नयाँ राजनीतिक सन्देश दिएका छन्।