गलकोटको सामुदायिक वनमा आगलागी, आगो नियन्त्रण बाहिर हुँदा स्थानीय चिन्तित

बागलुङ। सोमबार दिउँसो देखि गलकोट नगरपालिका वडा नं ५ र ७ का ३ सामुदायिक वनमा आगलागी हुँदा करोडौँको क्षति भएको छ । भैँसे दान सिङ डाँडा सामुदायिक वन गलकोट नगरपालिका वडा नं ५ देखि सुरु भएको आगो छिमेकी वडाको ठुला चौर सामुदायिक वनसम्म फैलिएको छ ।

ठुला चौर महिला सामुदायिक वन, दान सीङ डाँडा सामुदायिक वन सिमाना जोडिएका वन हुन । आगो अहिले पनि जङ्गलमा फैलिरहेको छ । आगो बस्ती तिर आउने खतरा रहेको भन्दै स्थानीयवासी चिन्तित भएको गलकोट नगरपालिका वडा नं ७ का वडा अध्यक्ष सुबेदार टिका बहादुर थापाले जानकारी दिए ।

आगो निभाउन स्थानीय र प्रहरीको सक्रियता रहेको वडा अध्यक्ष थापाले बताए । वन क्षेत्रमा आगलागी हुँदा वनमा रहेका जीवजन्तु, चराचुरुङ्गी, वनमा रहेका रुख बिरुवा जलेर नष्ट भएका छन् । साँझ परिसकेको र भीरमा आगलागी भइरहेको हुँदा आगो नियन्त्रण गर्न कठिन भएको ठुला चौर सामुदायिक वन उपभोक्ता समितिका सचिव सुनिता साहानी थापाले जानकारी दिइन् ।