सुर्खेत , वैशाख ३। आफ्ना चार सांसदले फ्लोर क्रस गरेर मुख्यमन्त्री महेन्द्रबहादुर शाहीलाई विश्वासको मत दिएपछि नेकपा एमाले कर्णाली प्रदेशसभाका सांसद छलफलमा जुटेका छन् ।
फ्लोर क्रस गरेका सांसदको विषयमा के गर्ने भन्ने निर्णय गर्न एमले संसदीय दलको बैठक बसेको छ । सांसद सुशील थापाले ‘फ्लोर क्रस’ गर्ने सांसदलाई कारवाहीको सिफारिस गर्ने बताए । पार्टीको ह्वीप उल्लंघन गर्दै सरकारलाई विश्वासको मत दिएकाले कारबाही गर्न लागिएको एमालेकै अर्का सांसदले अनलाइनखबरलाई बताए ।
शुक्रबार प्रदेशसभामा मुख्यमन्त्री महेन्द्रबहादुर शाहीले विश्वासको मत माग्दा एमालेका प्रकाश ज्वाला, कुर्मराज शाही, नन्दसिंह बुढा र अम्बरबहादुर थापाले ‘फ्लोर क्रस’ गर्दै मुख्यमन्त्री शाहीलाई मत दिएका थिए । एमालेकै सांसद देवी ओलीले भने मुख्यमन्त्रीलाई दिएको विश्वासको मत पछि सच्याएकी थिइन् ।