सन्ताेष गहतराज , पाल्पा । पछिल्लाे समयमा मानिस शहरमा बसाइँ सरी वा राेजगारिका लागि शहरमा बस्दा गाउँका खेतबारीहरू बारी,खरियाहरू जङ्गल काे रूपमा परिणत भएको छ । अहिले पाल्पाका धेरै खेतीयोग्य जमिनहरू पनि जङ्गलकाे रूपमा परिणत भएका छन। पछिल्लो समयमा काेराेनाकाे संक्रमणकाे जाेखिम बढे सँगै शहर बजारमा बस्ने मानिस अहिले गाउँ घरमा गई साेहि खेत वारि तथा खरियाहरू खनजाेत गरि कृषि कार्यमा लागेकाे सन्दर्भमा पाल्पा का विभिन्न स्थानीय तहहरूले उनिहरूलाई कृषि कार्यमा अझ प्रेरणा दिन बाझाे जमिन खनजाेत गर्ने कृषकहरूलाई अनुदान दिने भएको छ ।
लकडाउनकाे समयमा बाझाे जमिनकाे खनजाेत गर्दा कृषकहरूलाई समय काटन सजिलो हुने ,अर्गानिक रूपमा उत्पादित बस्तु उपभोग गर्न पनि पाउने तथा अनुदान समेत पाउने भए पछि कृषकहरू खुशी छन। यसै लकडाउनको समयमा जिल्लाका बिभिन्न स्थानीय तहहरुले लोककल्याणकारी कार्यक्रमलाई अगाडि बढाएका छन् । जिल्लाका १० वटै स्थानीय तहहरुले किसान र उत्पादनमैत्री कार्यक्रमहरुलाई प्राथमिकता दिएका छन् ।
यो अवधिमा जिल्लाका ३ वटा स्थानीय तहहरुले बाँझो खेतबारी जोत्नेहरुका लागि अनुदानको ब्यवस्था गर्ने निर्ण समेत गरिसकेका छन् ।
रैनादेवी छहरा गाउँपालिकाले जिल्लामै पहिलो पटक अनुदान कार्यक्रमको निर्णय गरेको हो । यो गाउँपालिकाले बाँझो जमिनमा खेती गर्नेहरुलाई अनुदान दिने निर्णय गरेको छ । बाझो जमिनमा अन्नबाली र तरकारी खेती गर्नेलाई प्रतिरोपनी ३ हजार र बाँझो जमिनमा कागती, सुन्तला र फलफूल रोपे प्रतिरोपनी २ हजार रुपैयाँ दिने निर्णय भएको प्रमुख प्रशासकीय अधिकृत खेतबहादुर खत्रीले बताए । यसप्रकारको अनुदानले बाझो रहेका खेतबारी जोतिने र कृषि उत्पादन समेत बढ्ने गाउँपालिकाका अध्यक्ष राम बहादुर कार्कीको भनाई छ ।
रामपुर नगरपालिकाले पनि बाझो जग्गामा खेती गर्नेहरुका लागि प्रतिरोपनी ३ हजार रुपैयाँ अनुदान दिने निर्णय गरेको नगरपालिकाका प्रमुख प्रशासकीय अधिकृत ऋषिराम आचार्यले बताए । नगरपालिकाले दुई वर्षभन्दा बढी समय बाँझो रहेको जग्गामा खाद्यान्न र तरकारी खेती गर्ने किसानलाई अनुदान दिने उनले बताए । बाँझो जमिन जोतेर मकै रोपे प्रतिरोपनी ३ हजार रुपैयाँ र मौसमी तरकारी खेती गर्नेहरुलाई प्रतिरोपनी ५ हजार रुपैयाँ अनुदान दिने निर्णय गरेको छ ।उत्पादन बढाउन र खाद्य संकट नहोस् भन्नका लागि कार्यपालिकाले यो निर्णय गरेको रामपुर नगरपालिकाका मेयर रमणबहादुर थापाले बताए ।
त्यस्तै माथागढी गाउँपाालिकाले पनि खेतीयोग्य बाँझो जमिनमा खेती गर्नेलाई अनुदान घोषणा गरेको छ । २ वर्ष अघिदेखि बाँझो रहेको खेतीयोग्य जमिनमा खेती गर्ने किसानले अनुदान पाउने गाउँपालिका अध्यक्ष सन्तोष थापा मगरले बताए । बाँझो जग्गामा पुन खेती गर्नेहरुलाई प्रतिरोपनी ३ हजार अनुदान दिइने गाउँपालिकाका प्रमुख प्रशासकीय अधिकृत राजु नेपालले बताए । स्थानीय तहहरुको यो निर्णयले बिबिध कारणले बाझो रहेका जग्गाहरु पुनः खन जोत गर्न किसानहरुलाई हौसला मिल्ने बताइएको छ ।
