काठमाडौं । पाकिस्तानमा बुधबार सम्पन्न आम निर्वाचनको मतगणना सुरु भएको छ ।
यो चुनावमा पूर्वप्रधानमन्त्री नवाज शरीफको पार्टी मुस्लिम लिग (नवाज) र पूर्वक्रिकेटर इमरान खानको पार्टी तहरिक ए इन्साफबीच कडा टक्कर हुने बताइएको छ ।
१० करोड ६० लाख मतदाता पाकिस्तानमा हिंसाको आशंकाका बीच भएको मतदानमा लाखौं मानिस सहभागी भएका छन् ।
पश्चिमी शहर क्वेटाको एक मतदान केन्द्रबाहिर भएको आत्मघाती आक्रमणमा ३० जना भन्दा बढीको मृत्यु पनि भएको छ । केही स्थानमा झडप पनि भए ।
चुनावका क्रममा भएका हिंसालाई लिएर पाकिस्तानी सेनामाथि चुनावमा हस्तक्षेप गरेको आरोप पनि लाग्दै आएको छ । तर, सेनाले यस्ता आरोप अस्वीकार गरेको छ ।
पाकिस्तानी सञ्चारमाध्यमहरुका अनुसार चारै प्रान्त पन्जाब, खाइबर पख्तुनख्वा, सिन्ध र बलुचिस्तानमा मतदाताले उत्साहपूवर्क मतदान गरेका छन् । मतदाताको लामो लाइन रहेको भन्दै पाकिस्तान मुस्लिम लिग-नवाजले निर्वाचन आयोगलाई चिठी लेखेर मतदानको अवधि एक घन्टा थप्न आग्रह गरेको थियो ।
त्यसपछि पाकिस्तान पिपुल्स पार्टी, पाकिस्तान तहरिक ए इन्साफ र अवामी मुस्लिम लिगले पनि निर्वाचन आयोगलाई मतदानको समय थप्न आग्रह गरेका थिए । तर, निर्वाचन आयोगले निर्वाचन अवधी थप्न अस्वीकार गर्यो ।
पाकिस्तानको निर्वाचन आयोगले ६ बजेभन्दा अगाडि मतदानको लाइनमा बसेका सबैलाई मतदान गर्न दिने भन्दै उसले मतदान अवधि थप्न इन्कार गरेको हो ।
निर्वाचन आयोगले २६ जुलाई अपरान्ह २ बजेसम्ममा सबै मत परिणाम घोषणा गरिसक्ने जनाएको छ ।
पाकिस्तानमा संघीय संसद र प्रान्तिय संसद दुवैको निर्वाचन एकैसाथ भएको हो । यो निर्वाचन नयाँ पाकिस्तानको लागि भएको पाकिस्तानी सञ्चारमाध्यमहरुले जनाएका छन् ।
३४२ सिट रहेको पाकिस्तानको राष्ट्रिय सभामा २७२ सिटको लागि प्रत्यक्ष निर्वाचन हुने व्यवस्था छ भने ६० सिट महिलाको लागि र १० सिट धार्मिक अल्पसङ्ख्यकको लागि आरक्षण गरिएको छ । निर्वाचनमा एउटै पार्टीले बहुमत ल्याउने सम्भावना धेरै कम भएकाले गठबन्धन सरकार बन्ने सम्भावना देखिन्छ ।
संघीय र प्रान्तीय सबै गरी ८४९ सिटको लागि भएको निर्वाचनमा जम्मा ११ हजार ६७३ उम्मेदवारले भाग लिएका छन् । जसमध्ये ३,४२८ राष्ट्रिय सभाको लागि र ८,२४५ प्रान्तीय सभाको लागि मैदानमा उत्रिएका छन् ।
