भद्रपुर । भद्रपुर नगरपालिकामा कर्मचारीतन्त्र हावी हुँदा कागज मिलाएर खाने प्रवृत्ति बढेर नगरको विकास सुस्ताउँदै गएको नगरबासीले गुनासो गर्न थालेका छन् ।
सेवाग्राहीको काम गर्ने जिम्मेवारी पाएका अधिकांस कर्मचारी अपारदर्शी शैलीमा आफ्नै तजविजका विभिन्न परियोजनामार्फत गोष्ठी सेमिनारको आयोजना गरी आफू–आफू नै भत्ता बाँडेर खाने गरेका छन् ।
कर्मचारीमा निर्भर भएर नगरको राजनीतिक नेतृत्व कमजोर हुँदै गएको फाइदा उठाउँदै कर्मचारीतन्त्रको मनोमानीमा कागजी कामले तीव्रता पाएर नगरपालिका कमाइ खाने भाँडो बन्दै गएको हो । कर्मचारी मात्र नभएर नगर प्रमुख उपप्रमुख र प्रमुख प्रशासकीय अधिकृत समेतलाई कार्यालयमा नगरबासीले भेट्न निकै सकस पर्ने गरेको छ । विषयगत कार्यालयमा काम गर्ने अधिकांस कर्मचारी आफ्नै व्यक्तिगत लाभका कार्यमा घुम्ने गरे पनि नियन्त्रण नहुँदा विकृति बढ्दै गएको नगरबासीको गुनासो आइरहेको छ । स्थानीयको गुनासो सुनुवाइ नहुँदा विकृति मौलाउने वातावरण बन्दै गएको छ ।
यस विषयमा जिज्ञासा राख्दा भद्रपुर नगरपालिकाका प्रमुख प्रशासकीय अधिकृत टेककुमार रेग्मी नगरपालिकाका कर्मचारी नियमित कार्यालयमा रहने गरेको बताए । उनले केही प्राविधिक कर्मचारी फिल्डको काममै रहे पनि अन्य कर्मचारी कार्यालयमा भेटिने समेत दावी गरेका छन् ।
जनगुनासो सम्बन्धमा नगर प्रमुख गणेश पोखरेल प्राविधिकबाहेकका कर्मचारीहरू कार्यालयमै बसेर सेवा प्रवाह गर्नु पर्ने दायित्व रहेकोले सो पालना गराउन लाग्ने बताउँछन् । उनले आफू नगरबासीकै काममा बाहिर जाने गरेको प्रष्ट पार्दै दिनमा एक पटक कार्यालय आउने गरेको बताए ।
योजना, प्रशासन, शिक्षा, स्वास्थ्य, कृषि, पशु सेवा, सामाजिक सुरक्षालगायतका विषयगत कार्यालयबाट प्रवाह हुने सेवामा समेत नगरबासीले प्रश्न उठाउन थालेका छन् । कमिशन या अतिरिक्त लाभ दिन असहमत सेवाग्राहीले चाहेको सेवा नै पाउन कठिन हुने गरेको गुनासो बढिरहेको छ ।
