झापा – नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले राष्ट्रिय प्रजातन्त्र पार्टीलाई एमालेले आशिर्वाद दिएको बताएका छन् ।
झापाको भद्रपुरमा शुक्रबार आयोजित झापाको क्षेत्र नं ३ स्तरीय एमाले र राप्रपाको संयुक्त अगुवा कार्यकर्ता भेलालाई सम्बोधन गर्दै नेकपा एमालेका अध्यक्ष ओलीले एमालेको आशिर्वाद पाएर यसपाली राप्रपा राष्ट्रिय पार्टी हुने दाबी गरे । उनले यसपाली पनि राप्रपालाई एमालेले ‘आयुष्मान भवः’ भनेको बताए ।
ओलीले भने, ‘एमालेले आयुष्मान भवः भनेपछि पनि जितेन भने के अर्थ रह्यो र । त्यसैले एमालेको इज्जतका लागि पनि राजेन्द्र लिङ्देनले यो क्षेत्रबाट जित्नुपर्छ ।’
झापाको क्षेत्र नं ३ मा प्रतिनिधि सभा सदस्यको उम्मेदवार राप्रपाका अध्यक्ष राजेन्द्र लिङ्देनलाई नेकपा एमालेले समर्थन गरेको छ । त्यस्को सट्टा झापाको क्षेत्र नं ५ मा प्रतिनिधि सभा सदस्यका उम्मेदवार ओलीलाई राप्रपाले समर्थन गरेको छ ।
कार्यकर्ता भेलालाई सम्बोधन गर्दै गठबन्धनको नाम सुन्दा पनि आफूलाई दिक्क लाग्ने गरेको ओलीले बताए । उनले भने, ‘गठबन्धन भन्ने शब्द सुन्दा पनि कस्तो कस्तो लाग्ने । देशद्रोहीहरूलाई छेक्न भए पनि हलोमा मत हाल्नुहोस् ।’
कार्यक्रममा संगै उपस्थित रहेका राप्रपा अध्यक्ष तथा झापा क्षेत्र नं ३ का प्रतिनिधि सभा सदस्यका उम्मेदवार राजेन्द्र लिङ्देनले पुनः पाँच बर्ष अघिको इतिहास दोहोर्याउन मतदातालाई आग्रह गरे ।
लिङ्देनले भने, ‘एउटा सांसदले के गर्नु पर्थ्यो र के गरें भन्ने कुरा छर्लंग छ । सबै काम भएनन् । तर ती काम पूरा गर्न पनि पाँच बर्ष अघिको इतिहास् दोहोर्याइ दिनुहोस् ।’
झापामा एमाले र राप्रपाबीच चुनावी तालमेल गर्ने निर्णयपछि ओली र लिङ्देनले दोस्रो पटक शुक्रबार भद्रपुरमा संयुक्त कार्यक्रमलाई सम्बोधन गरेका हुन् ।
