मोरङ – विराटनगर महानगरपालिका–७ मा मधुबाबु तिवारीले काका दामोदर तिवारीलाई पराजित गरेका छन्।
स्थानीय तह निर्वाचनमा मधुबाबु नेपाली कांग्रेस र दामोदर नेकपा एमालेको उम्मेदवारीसहित प्रतिस्पर्धामा थिए।
सोही क्रममा बुधबार बेलुका आदर्श माविस्थित निर्वाचन अधिकृतको कार्यालयले वडाको अन्तिम मतगणना जारी गर्दै कांग्रेसका ४८ वर्षीय उम्मेदवार मधुबाबु तिवारीलाई विजयी भएको घोषणा गरेको हो।
०७४ सालको निर्वाचनमा समेत सोही वडामा जितेर सुखद कार्यकाल बिताएका तिवारीले यसपटक १ हजार ३ सय १२ मत पाएका छन्। उनले एमालेका प्रतिस्पर्धी ६६ वर्षीय दामोदर तिवारीलाई ८ सय ४६ को फराकिलो मतान्तरले पराजित गरेका छन्।
एमालेका उम्मेदवार तिवारीले ४ सय ६६ मत पाएका थिए। चुनावी मैदानमा रहेको दुवै जना नातामा काका भतिजा हुन्। यससँगै महानगरको दुई वटा वडामा कांग्रेसले जित निकालेको छ। वडा नम्बर १६ मा उद्धव भुजेलले जितेका छन्।
त्यसैगरी, नेकपा एमालेले वडा नम्बर १, २ र १९ मा जित निकाल्दा, जसपाले वडा नम्बर १७, राप्रपाले १३ र स्वतन्त्रले वडा नम्बर १८ मा जित हात पारेको छ।
