बिर्तामोड ,झापामा ७०.४७ प्रतिशत मत खसेको जिल्ला निर्वाचन कार्यालयले जनाएको छ ।
जिल्लामा ४ लाख ५५ हजार ४१७ मतदाताले मतदान गरेको सो कार्यालयले जनाएको हो ।
बिहान ७ बजे शुरु भएर निर्धारत समय साँझ ५ बजे सम्पन्न मतदानमा त्यति प्रतिशत मत खसेको निर्वाचन कार्यालय प्रमुख तुलसीकुमार नेपालले बताए । जिल्लाभर मतदान शान्तिपूर्ण सम्पन्न भएको उनले बताए । झापामा ६ लाख ४६ हजार २३४ जना मतदाता रहेका छन् । उनीहरुको लागि २८६ मतदानस्थल र ७५५ मतदान केन्द्र व्यवस्था गरिएको थियो ।
बिर्तामोडमा करिब ७१ प्रतिशत मत खसेको छ । बिर्तामोडमा ४० हजार ९ सय ६५ मत खसेको जनाइएको छ । जुन ७१ प्रतिशत भन्दा बढी हो । बिर्तामोडमा २८,५२६ पुरुष, २८,८८१ महिला र २ अन्य जना मतदाता रहेका छन् । उनीहरुको लागि १८ वटा मतदानस्थलमा ६४ मतदान केन्द्रको व्यवस्था गरिएको थियो । ती सबै मतदान केन्द्रहरुबाट मत पेटिका ल्याइसकिएको छ । अब मतगणना कहिलेदेखि गर्ने भन्ने विषयमा निर्णय गर्न सर्वदलीय बैठक राखिने भएको छ । शुक्रबार रातिबाटै मतगणना शुरु गरिने मुख्य निर्वाचन अधिकृत डम्बरप्रसाद काफ्लेले बताए ।
त्यस्तै दमकमा १८ हजार ७१६ पुरुष , २१ हजार १७९ महिला , कनकाईमा १२ हजार ८३ पुरुष , १३ हजार ७६८ महिला , कचनकवलमा ११ हजार ५६१ पुरुष , १० हजार ११६ महिला , बुद्धशान्तिमा १२ हजार १८७ पुरुष , १३ हजार ९७ महिला , कमलमा १३ हजार ९१४ पुरुष र १२ हजार १२६ महिलाले मतदान गरेको नेपालले बताए । उनका अनुसार अन्य पालिकाको पनि विवरण संकलन गर्ने कार्य भइरहेको छ ।
