कर्णाली: कर्णाली प्रदेशमा झण्डै २ लाख मतदाता थपिएका छन् । पछिल्लो २ वर्षमा १ लाख ८६ हजार ४ सय ३६ मतदाता थपिएका हुन् । २०७४ मा प्रदेशभर ८ लाख १४ हजार ८ सय ४६ मतदाता थिए । आगामी वैशाख ३० गते हुने स्थानीय तहको निर्वाचनमा कर्णाली प्रदेशबाट १० लाख मतदाता सहभागी हुन पाउने भएका छन् ।
निर्वाचन आयोगले सार्वजनिक गरेको नामावलीअनुसार कर्णालीमा १० लाख १ हजार २ सय ८२ जना मतदाता रहेका छन् । कुल मतदातामध्ये ५ लाख ६ हजार १ सय ८० जना पुरुष छन् भने महिला मतदाताको संख्या ४ लाख ९५ हजार ९९ जना रहेको छ ।
कर्णालीका दश जिल्लामध्ये सबैभन्दा धेरै मतदाता सुर्खेतमा छन् । २ लाख ३८ हजार ४ सय ५७ मतादाता भएको सुर्खेतमा पुरुष १ लाख १६ हजार ३ सय ३६ जना छन् भने महिला मतदाताकाे संख्या १ लाख २२ हजार १ सय २१ छ ।
यसैगरी दैलेखमा १ लाख ५८ हजार ४ सय ८९ जना मतदाता रहेको निर्वाचन आयोगले जनाएको छ । जाजरकोटमा १ लाख ३ हजार ८ सय ६९, रुकुम पश्चिममा १ लाख ४ हजार ४ सय ८२ र सल्यानमा १ लाख ५७ हजार ७ सय १५ जना मतदाता रहेको निर्वाचन आयोगले जनाएको छ ।
आयोगका अनुसार डोल्पामा २२ हजार ४ सय ४०, मुगुमा ३५ हजार ८९, जुम्लामा ६७ हजार ७ सय ४४ र कालीकोटमा ८० हजार ४ सय १६ तथा हुम्लामा ३२ हजार ५ सय ७१ मतदाता छन् । निर्वाचनका लागि प्रदेशभर ९ सय ७ वटा मतदानस्थल र १ हजार ३ सय ८५ वटा मतदान केन्द्र निर्धारण गरिएको छ ।
