काठमाडौँ– बेलायतले पाँच रुसी बैँकहरुमाथि प्रतिबन्ध लगाएको छ। बेलायती प्रधानमन्त्री बोरिस जोन्सनले बेलायतले अन्तिम समयसम्म पनिकूटनीतिक समाधान खोज्ने तर रुसी राष्ट्रपति भ्लादिमिर पुटिन अगाडि बढ्दै गए भने अन्य सम्भावनाहरुमाथि विचार गर्नुपर्ने बताएका छन्।
युक्रेनका राष्ट्रपति जेलेनस्कीलाई निरन्तर सहयोग गर्ने प्रतिबद्धता पनि प्रधानमन्त्री जोन्सनले दिएका छन्।
बेलायत र यसका समर्थक राष्ट्रहरुले निरन्तर रुपमा रुसमाथि प्रतिबन्ध लगाउने बिबिसीले उल्लेख गरेको छ।
प्रधानमन्त्री जोन्सनले पाँच रुसी बैँकहरुमाथि प्रतिबन्ध लगाएलगत्तै अझ कडा कदम चाल्ने चेतावनी दिएका छन्।
रुसी राष्ट्रपति भ्लादिमिर पुटिनले युक्रेनको दक्षिणपूर्वी क्षेत्र लुहान्स्क र डोनेट्स्कलाई ‘लुहान्स्क एण्ड डोनेट्स्क पिपुल्स रिपब्लिक’ का रुपमाघोषणा गरी त्यहाँका बिद्रोहीलाई औपचारिक मान्यता प्रदान गरेपछि बेलायतसहित पश्चिमा राष्ट्रहरु ऊसँग चिढिएका हुन्।
त्यससँगै बिद्रोहीसँग भएको सन्धि अनुसार ‘शान्ति स्थापना’ का लागि भन्दै रुसी सैनिक युक्रेनी क्षेत्रमा तैनाथ गर्न आदेश पनि पुटिनले दिएका छन्। सो आदेश अनुसार डोनेट्स्क र लुहान्स्कमा रुसी सैनिक प्रवेश गरेको अन्तर्राष्ट्रिय सञ्चारमाध्यमले जनाएका छन् ।
