बिर्तामोड । बिर्तामोडस्थित अतिथी सदनमा नेपाल पत्रकार महासंघ झापा शाखाले २६ जना झापाली पत्रकारलाईपुरस्कार तथा सम्मान समर्पण गरेको छ । शाखाले आफ्नो १४ औं जिल्ला अधिवेशनको अवसरमा उनीहरुलाई सम्मान तथा पुरस्कार वितरण गरेको हो ।
नेपाल पत्रकार महासंघ झापा शाखाले, बिर्तामोडस्थित अतिथी सदनमा आयोजित खुला सत्रमा एक लाख १ हजार १११ रुपैँया राशिको मोती पत्रकारिता पुरस्कार अग्रज पत्रकारद्वय कृष्ण हुमागाईँ र केसव आचार्य लाई संयुक्त रुपमा प्रदान गरेको थियो । पहिलो पटक संयुक्त रुपमा दुई जनालाई उक्त पुरस्कार प्रदान गरिएको हो ।
त्यस्तै अमेरिकाको टेक्सासमा रहेको हेम सरिता फाउण्डेशनले स्थापना गरेको ‘टंक प्रसाद रमादेवी पाठक पत्रकारिता पुरस्कार’ पत्रकार राजबाबु शंकरलाई प्रदान गरियो । उक्त पुरस्कारको राशि ५० हजार पाँच ५५५ रहेको छ । शंकरले लामो समयदेखि साप्ताहिक समाचार नामक साप्ताहिक पत्रिका सम्पादन गर्दै आएका छन् ।
त्यस्तै पूर्वका जेठो पत्रकार श्यामकृष्ण उपाध्यायद्वारा सम्पादित झापाको पहिलो पत्रिका केटोको सम्मानमा स्थापित ‘केटो पत्रकारिता पुरस्कार’ पूर्वाञ्चल डटकम अनलाइन संयोजक नरेन्द्र ढकाललाई प्रदान गरियो । उक्त पुरस्कारको राशी २५ हजार ५५५ रुपैँया रहेको छ ।
यसै बर्षबाट महासंघ झापाले स्थापना गरेको समावेशी सक्रिय पत्रकारिता पुरस्कार पत्रकार गणेशमान मुखियालाई प्रदान गरिएको छ । उक्त पुरस्कारको राशी २५ हजार ५५५ रुपैयाँ रहेको छ ।
सोही अवसरमा उदीयमान पत्रकारिता पुरस्कार आँगन एफएमका चन्द्र बस्नेत र प्रकाश पौडेललाई प्रदान गरियो । उक्त पुरस्कारको राशी जनही ११ हजार १ सय ११ रुपैयाँ रहेको छ । त्यसै गरी कार्टुन पत्रकारीता बाट पवन राजवंशीलाइ सम्मान गरीएको थियो ।
‘केदार मनमाया बजगाई लैङ्गिक समानता पत्रकारिता पुरस्कार’ पत्रकारद्वय लीला अनमोल (२०७९) र रेजिना गौतम (२०८०) लाई प्रदान गरिएको थियो । उक्त पुरस्कारको राशी जनही २५ हजार रुपौया रहेको छ ।
त्यसैगरी पत्रकार महासंघ झापाले यसै बर्षदेखि स्थापना गरेको ११ हजार १ सय ११ नगद राशीको विधागत पुरस्कार झुलन रेग्मी (छापा), उद्धव पुरी (अनलाईन), पुष्प बराल (रेडियो), सुदिप अधिकारी (टेलिभिजन)लाई प्रदान गरिएको थियो ।
उदियमान पुरस्कारबाट प्रकाश पौडेल र चन्द्र बस्नेत पुरस्कृत भए । उक्त पुरस्कारको राशी जनही ११ हजार १११ रुपैँया रहेको छ ।
महासंघले ६५ बर्ष उमेर पूरा गरेका झापाका ११ जना अग्रज पत्रकारहरुलाई ‘दीर्घ सेवा सम्मान’ प्रदान गरेको छ । नकुलकाजी, गोबिन्दचन्द्र छेत्री, गञ्जबहादुर दाहाल, सिरोसान्दाई, लीला बराल, लेखनाथ पदरेशी, गोपाल गिरी, चिन्तामणि दाहाल, नेत्र पाठक, केशव आचार्य र लक्ष्मण ढकाललाई उक्त सम्मान प्रदान गरिएको थियो । उनीहरुलाई नगदसहित सम्मान पत्र प्रदान गरिएको थियो ।
कार्यक्रममा मेची–महाकाली पहिलो साइकल यात्री मुक्ति पौडेललाई समेत सम्मान गरिएको थियो । कार्यक्रमका प्रमुख अतिथि सभामूख देवराज घिमिरे, प्रतिनिधिसभा सदस्य विश्वप्रकाश शर्मा, नेकपा माओवादी केन्द्र संसदीय दलका नेता तथा पूर्व मन्त्री इन्द्र आङ्बोलगायतले उनीहरुलाई सम्मान तथा पुरस्कार वितरण गरेको थियो ।
सोहि अवसरमा महासंघ झापाद्वारा प्रकाशित चौथो अङ्ग नामक बुलेटिनको दोस्रो अंक विमोचन गरिएको थियो । महासंघ झापाका अध्यक्ष एकराज गिरीको अध्यक्षतामा भएको अधिवेशनको खुला सत्रमा सहभागीहरुलाई महासंघ झापाका उपाध्यक्ष केशव भट्टराईले स्वागत गरेका थिए भने सचिव डिकेश लामाले सञ्चालन गरेका थिए ।
