निजी गाडीले भाडामा यात्रु बोक्न पाइदैन तर ट्राफिक अनुगमन हुन नसक्दा निर्वाध रुपमा निजि गाडीहरु भाडामा चलेका छन, यहि सडकमा केही समय अगाडि बस दुर्घटना हुदा ६ जनाले ज्यान गुमाएका थिए भने १८ जना घाइते भएका थिए ।
भबिन्द्र गौतम, पाल्पा । आइतबार भएको जीप दुर्घटनामा मृत्यु हुनेको संख्या ५ पुगेको छ । सालझण्डी बाट अर्घाखाँचीको पाणिनी तर्फ जादै गरेको जीप पाल्पाको रैनादेवी छहरा गाउँपालिका–८, सत्यवती को केवँरेछेडामा दुर्घटनामा परेको थियो । दुर्घटनामा १० जना घाइते भएका छन । उनिहरुको रुपन्देहीका विभिन्न अस्पतालमा उपचार भइरहेको छ । मृतकहरु पाणिनी गाउँपालिका–१, की ५५ वर्षीया श्यामकला परियार, पाणिनीकै चालक २६ वर्षीय रमेश विक, पाणिनी २ पोखराथोककी २५ वर्षीया सीता गौतम, पोखराथोककी दुई वर्षीय संयोग गौतम र पणेनाका ३७ वर्षीय विजय पोखरेल (कृष्णप्रसाद) रहेको जिल्ला प्रहरी प्रहरी कार्यालय पाल्पाका प्रहरी उपरीक्षक हेरम्ब शर्माले जानकारी दिनुभयो । उनिहरु मध्ये ३ जनाको घटनास्थलमा र दुई जनाको उपचारका क्रममा अस्पतालमा मृत्यु भएको हो । मृतक मध्ये सीता र संयोग आमा छोरा हुन् ।
घाइतेमध्ये ५ जनाको अवस्था अझै गम्भीर रहेको प्रहरीले जनाएको छ । जसमा चार जनाको भैरहवास्थित मेडिकल कलेज र एक जनाको चौराहा अस्पताल बुटवलमा उपचार भइरहेको छ । यस्तै पाँच जना घाइतेको लुम्बिनी प्रादेशिक अस्पताल बुटवलमा उपचार जारी छ । उनिहरुको अवस्था भने सामान्य छ । घाइतेमध्ये अधिकांश बालबालिका रहेका छन् । रुपन्देहीको सालझण्डीबाट अर्घाखाँचीको पाणिनीको पणेनातर्फ जाँदै गरेको लु १ च ९०२४ नम्बरको जिप ढोरपाटन सडकको केवँरेछेडामा दुर्घटनामा भएको हो । दुर्घटनाग्रस्त जीप सडकदेखि ७० मिटर तल खसेको थियो ।
दुर्घटनापछि अर्घाखाँचीको पाणिनी र पोखराथोक गाउँ शोकमग्न भएको छ । दुर्घटनाग्रस्त जीप उकालेमा ब्याक भएको स्थानीयले बताएका छन । जिपमा पछाडि सामान र यात्रुसमेत अधिक राखिएको थियो । रातो प्लेटको डबल क्याब जीपको क्षमता ५ जनाको मात्र हुन्छ । यसमा ५ जनाको बीमाले खर्च बेहोर्ने र थपको उपचार खर्च सवारी धनीले बेहोर्नुपर्ने हुन्छ ।
निजी गाडीले भाडामा यात्रु बोक्न पाइदैन तर ट्राफिक अनुगमन हुन नसक्दा निर्वाध रुपमा निजि गाडीहरु भाडामा चलेका छन । सालझण्डी बाट ढोरपाटन सडक हुँदै नियमित रुपमा निजि पिकअप गाडी चल्ने गर्छन । उनिहरु भाडामा यात्रु ओसारपसार गर्छन । त्यस क्षेत्रमा प्रहरीको पहुच न्यून रहेको छ ।
यहि सडकमा केही समय अगाडि बस दुर्घटना हुदा ६ जनाले ज्यान गुमाएका थिए भने १८ जना घाइते भएका थिए ।
