काठमाडौं । यही फागुन ८ गते बिहान प्रधानमन्त्रीको सरकारी निवास बालुवाटारमा सत्ता गठबन्धनमा आबद्ध दलका शीर्ष नेताहरूको बैठक बस्यो । बैठकमा नेताहरूका फरक मतबीच अमेरिकी अनुदान सहयोग परियोजना मिलेनियम च्यालेन्ज कम्प्याक्ट (एमसीसी) सम्झौतालाई संसद्मा टेबल गर्ने निर्णय भयो ।
सोही दिन बिहान बसेको कार्यव्यवस्था परामर्श समितिको बैठकले पनि एमसीसीलाई प्रतिनिधिसभाको कार्यसूचीमा राख्ने निर्णय ग¥यो । तर, नेकपा (माओवादी केन्द्र)का सांसद्हरूले फरक मत राखे । दिउँसो १ बजेपछि बसेको प्रतिनिधिसभा बैठकमा एमसीसी टेबल भयो । एमसीसी टेबल हुनेबित्तिकै फागुन १२ गतेसम्मका लागि बैठक स्थगित गरियो ।
आजको बैठकमा एमसीसी सम्झौतामाथि सैद्धान्तिक छलफल सुरु गराउने सरकारको तयारी थियो । प्रतिनिधिसभा बैठकअघि बसेको कार्यव्यवस्था परामर्श समितिको बैठकमा पनि एमसीसीमाथि सैद्धान्तिक छलफल गर्ने निर्णय भयो र संसद्को कार्यसूची बन्यो । तर, अन्तिम समयमा बैठक स्थगित गरियो । प्रतिनिधिसभाको अर्को बैठक भोलिका लागि बोलाइएको छ ।
“कार्यव्यवस्था परामर्शको बैठकमा आजबाट सामान्य सैद्धान्तिक छलफल सुरु गर्ने, बोल्न चाहने सांसदलाई पाँच मिनेटको समय दिने भन्ने कुरा भएको थियो । त्यसपछि सरकारसँग के कुरा भयो थाहा भएन,” उनले बाह्रखरीसित भने ।
कार्यव्यवस्था परामर्श समितिको बैठकमा सत्तासाझेदार दल माओवादी केन्द्र र नेकपा (एकीकृत समाजवादी)का प्रमुख सचेतकले संसद् अवरोध हटाएपछि मात्रै छलफल गर्दा उचित हुने धारणा राखेको पनि उनले बताए ।“समितिको बैठकमा सहमति जुटेको हो । तर, किन बैठक स्थगित भयो थाहा भएन,” उनले भने ।
एमाले मिलाउन संसद् स्थगन
बिहीबार बिहानै गठबन्धनमा आवद्ध तर एमसीसीको विपक्षमा रहेका दलहरु नेकपा(माओवादी केन्द्र) का अध्यक्ष पुष्पकमल दाहाल प्रचण्डले नेकपा(एकिकृत समाजवादी)पार्टीका अध्यक्ष माधव कुमरा नेपालसँग सिंहदरवारमा छलफल गरेका थिए ।
बैठकमा माओवादीका तर्फबााट देव गुरुङ, नारायणकाजी तथा नेकपा(एस) का तर्फबाट झलनाथ खनाल लगायतका नेताहरू पनि सहभागि भएका थिए । छलफलमा सहभागि माओवादी नेता देव गुरुङ्का अनुसार उक्त छलफलमा एमसीसीको पक्षमा उभिन नसक्ने नेताहरूबीच कुराकानी भएको थियो ।
बैठकलगत्तै प्रधानमन्त्री देउवा भेट्न माओवादी अध्यक्ष प्रचण्ड बालुवाटार पुगेका थिए । बालुवाटारमा प्रचण्डले एमसीसी परियोजनाको पक्षमा उभिन नसक्ने बताएका थिए । लगत्तै देउवाले कि त एमसीसी पास गर्न सहयोग गर्नुहोस् नभए सत्ता छाड्नुहोस् भनेका थिए । जवाफमा प्रचण्डले सरकार नछाड्ने बरु सके निकाल्नुहोस् भनेका थिए । देउवाले पनि एमसीसी पास गरेर छाड्छु भनेको स्रोतको दाबी छ ।
“यो आज बिहान मात्र भनेको होइन । अघिल्लो भेटमा पनि प्रधानमन्त्रीज्यूले यसरीनै आफ्नो कुरा राख्नुभएको हो ।तर, उनीहरुलाई सत्ता पनि चाहिएको छ , सरकारलाई पनि सहयोग नगर्ने भन्छन् । यस्तो मिल्दैन,” स्रोतले भन्यो ।कार्यव्यवस्था परामर्शको बैठकले समेत कार्यसूची तयार पारेपछि किन बैठक रोक्नुपरेको त भन्ने बाह्रखरीको प्रश्नमा ती सांसदले एमसीसी परियोजना अनुमोदन गराउने तयारीस्वरु बैठक स्थगन भएको बताए ।
“एउटा बैठक स्थगन गर्दैमा गठबन्धनको बोज विसाउनुपर्छ भने किन नगर्ने ? यीनीहरूको भारी हामीले किन बोक्नु सधै,” ती सांसदले भने ।बैठक स्थगन गरेर देउवाले प्रमुख प्रतिपक्ष दल एमालेसँग संवाद सुरु गरेका छन् । देउवाको दाउँ गठबन्धले साथ नदिपछि एमालेलाई फकाएर भए पनि एमसीसी अनुमोदन गर्नेछ ।तर, एमाले सांसद योगेश भट्टराई भने प्रधानमन्त्रीले आफूहरुलाई ‘व्लाङ चेक’ देखाएको तर आफूहरु त्यसमा सहमत नहुने बताउँछन् ।
यता, सत्ताघटक माओवादी केन्द्रले पनि एमसीसीमा सरकार अल्पमतमा परेपछि समर्थन खोज्न बैठक स्थगन गरेको निष्कर्श निकालेको छ ।“एमसीसीमा सैद्धान्तिक छलफलमै स्पष्ट अल्पमतमा कांग्रेस अल्पमतमा पर्ने भएपछि प्रतिपक्ष दलसँग समर्थन माग्दै सर्त पुरा गर्न समय आवश्यक परेकाले बैठक स्थगन गर्नुपरेको हो,” माओवादीको बुझाइ छ ।
