काठमाडौँ: अर्थमन्त्री जनार्दन शर्माले माथिल्लो अरुण जलविद्युत् परियोजना निर्माणमा लगानीको लागि कुनै पनि समस्या नभएको दाबी गरेका छन् । नेपाल विद्युत् प्राधिरकणले परियोजनामा लगानी जुटाउने उद्देश्यले मंगलबार बैंक तथा वित्तीय संस्था र सार्वजनिक वित्तीय संस्थानसँगको छलफल कार्यक्रम आयोजना गरेको थियो ।
साेही कार्यक्रममा बोल्दै अर्थमन्त्री शर्माले परियोजना निर्माणमा लगानीको लागि कुनै पनि समस्या नभएको बताए । उनले यो परियोजना सरकारको परियोजना भएकाले ढुक्क भएर लगानी गर्न सबैसँग आग्रह गरे ।मन्त्री शर्माले माथिल्लो अरुणमा स्थानीयबासीको समेत लगानी रहनेगरी सेयर संरचना तयार पारिने बताए । माथिल्लो अरुण मात्रै नभएर बुढीगण्डकी, मुगु कर्णाली लगायत अन्य जलाशययुक्त आयोजना तत्काल अगाडि बढाउने तयारीमा सरकार रहेको मन्त्री शर्माको भनाइ छ ।
अब कसैसँग ऋण लिँदा जुन परियोजनाको लागि लिइने हो साेही आयोजनाले तिर्ने व्यवस्था गरिने उनले बताए । उनले भने ‘लगानी हाम्रा भएका संस्थानहरुबाट नभए अन्तबाट खोजेर भए पनि ल्याउन सकिन्छ, लगानी समस्या होइन, यसरी काम गर्छौं भन्ने बलियो प्रतिबद्धता चाहिन्छ । अर्थमन्त्रालयमा छलफल भइरहेको विषय के भने अहिले ऋण मात्रै लिइरहेका छौं, ऋण कहाँबाट तिर्ने थाहा छैन । अब लिने ऋण जनताको टाउकोमा होइन, आयोजनाको टाउकोमा राख्यो भने तिर्न सकिन्छ ।’
