पाल्पा, ३ भदौ ।
श्रीकृष्ण जन्माष्टमीको अवसरमा पाल्पाका शक्तिपिठहरुमा भक्तजनको घुइँचो लागेको छ । पाल्पाको तानसेनमा रहेको भगवती मन्दिर, कैलाशनगरको कृश्न मन्दिर तथा प्रसिद्ध रम्भादेबी मन्दिरमा दर्शनगर्ने भक्तजनको बिहानैदेखि भिडभाड रहेको थियो ।
ज्ञानयोग, कर्मयोग र भक्तियोगका प्रणेता भगवान श्रीकृष्ण जन्माष्टमी आज भगवान् श्रीकृष्णको पूजा आराधना गरी मनाइँने गरिन्छ । भगवान श्रीकृष्णको जन्म द्वापरयुगमा भाद्र कृष्ण अष्टमीको मध्यरातमा भएकाले आजको दिनलाई ‘श्रीकृष्ण जन्माष्टमी’ र रातलाई ‘मोहरात्री’ भनिन्छ । यस दिन देशभरिका कृष्णमन्दिरमा भगवान् श्रीकृष्णको पूजा–आराधना, प्रवचन, भजन कीर्तन गर्नाका साथै विशेष गरी महिला, पुरुष ‘व्रत’ गरी रातभर जाग्राम बस्ने प्रचलन छ ।
अन्याय, अत्याचार र राक्षसी प्रवृत्तिबाट सम्पूर्ण मानवको रक्षा गर्न भगवान् विष्णुको आठौँ अवतारका रूपमा जन्मिएका श्रीकृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गरेका थिए । कुरुक्षेत्रमा कौरवहरूसँगको लडाइँमा संलग्न पाण्डवमध्येका अर्जुनलाई उपदेश दिने क्रममा स्वयम् श्रीकृष्णका मुखारविन्दबाट व्यक्त ‘श्रीमद्भागवतगीता’ पवित्र ग्रन्थ मानिन्छ । छोटकरीमा गीता नामले समेत चिनिने यो ग्रन्थ विश्वमै सबैभन्दा बढी भाषामा अनुवाद भएको विश्वास गरिन्छ ।
बाल्यकालदेखि नै आफ्ना विचित्र लीला देखाएका श्रीकृष्णले पुतना, कंश, जरासन्ध र शिशुपालजस्ता दानवीय प्रवृत्तिको सम्हार गरेको पौराणिक ग्रन्थमा उल्लेख छ । यस अवसरमा आज पाल्पाको तानसेनमा लाखेनाच, भजन कृतन सहित रातभरी भगवती मन्दिरमा जाग्राम बस्ने प्रचलन रहेको छ ।
